என் வீட்டு கடிகாரத்தில்
பத்து நிமிடங்கள் முன்னதாகக் கூட்டி வைத்தேன்,
எதிலும் கால தாமதமாகி விடக் கூடாதென.
………
எப்போது கடிகாரத்தில் மணி பார்த்தாலும்,
எந்த செயலுக்கென்றாலும்,
பதறாமல் நேரத்தைத்
தன்னிச்சையாக கூட்டி கழித்து,
சற்றே தள்ளிப் போட்டு விடுகிறது மனம்
‘பாத்துக்கலாம்;
இன்னும் பத்து நிமிடங்கள் இருக்கின்றன ‘…
சமீபத்தில் என் மனைவி தீட்டிய ஓவியத்தில் எழுதிய சில வரிகள்…
பனியோடு பனியாய்
தன் பணி மறந்து
உறைந்து போய்
எதிர் திசை நோக்கி நிற்கும் நேரமே!
என்னோடு சேர்ந்து,
உருகி, கரைந்து
எதிர்காலம் தாண்டி, அவளிடம்
விரைந்து செல்ல, வா!
திரி,
தன் தீ நாவால்
தன்னையும், எண்ணையையும்
தின்று கொண்டிருந்தது;
எரிந்து கொண்டிருந்தது விளக்கு.
அன்பே!
உனக்கு நான் கடிதங்கள் எழுதியிருக்கிறேனா?
– இல்லை.
அதனாலென்ன?
நுட்பங்கள் விரல் நுனியில் விளையாடும் கைபேசி யுகத்தில்
எல்லா செயலிகளிலும் நான் தட்டச்சி அனுப்பிய
ஒவ்வொரு செய்தியையும்
சிரிப்பான்களையும்
மீம்களையும்
படங்களையும்
ஒலி/ஒளித் துணுக்குகளையும்
ஒரு வரிச் செய்திகளையும் கூட
ஒன்று விடாமல் கோர்த்துப் பார்,
அப்போது புலப்படும்
நம் கைபேசி கால கடிதங்களும்,
அவை கட்டமைக்கும் மிக…மிகப் பெரிய நூலகமும்.
வலைப்பதிவுகளில் வெவ்வேறு காலகட்டங்களில் நான் எழுதிய கவிதைகளின் தொகுப்பே ‘உயிருடன்…’. ஒரு வட்டத்துக்குள் நில்லாமல், காதல், நட்பு, நம்பிக்கை, மூடநம்பிக்கை, வானம், மேகம், நிலவு, இரவு, மழை … எனப் பல்வேறு பாடுபொருட்களை வகை தொகையில்லாமல் தன்னுள் அடைத்து வைத்திருக்கிறது இத்தொகுப்பு. எழுத்து வாகனத்திற்கு வாசிப்பு எரிபொருள் அவசியம் என்று பற்ற வைக்க, வாசிப்பு என்னை பற்றிக் கொண்டது. எழுத்து, வாசிப்பைத் தொடர்ந்த எழுத்து முயற்சி, புதிய முயற்சிகளுக்காக வாசிப்பு என நீண்ட பயணத்தில், நான் நடை பழகியதன் தொகுப்பு இம்மின்னூல். நன்றி!
மின்னூல் :- http://freetamilebooks.com/ebooks/uyirudan-poems/
‘தாகத்திற்கு தண்ணீர் கிடைக்காமல்
காகம் ஒன்று அலைந்து கொண்டிருந்தது.
உண்பதற்கு உணவை வைத்தவர்கள்,
ஏனோ அருந்துவதற்கு நீரை வைக்கவில்லை.
நெடுநேரத்திற்கு பின்,
குறைகுடம் ஒன்று கண்ணில் தட்டுப்பட்டது.
அலகிற்கு எட்டாத அந்நீரைக் குடிக்க,
அருகில் கிடந்த சிறு கற்களை ஒவ்வொன்றாக
அந்த குடத்திற்குள் போட்டது. கற்களால்
மேல் எழும்பி விளிம்பு வரை வந்த நீரை
அருந்தி விட்டு, தாகம் தணிந்த மகிழ்ச்சியில்
‘கா கா’ என கரைந்து கொண்டே பறந்தது
அந்த புத்திசாலி காகம்.’
கதையைப் படித்த மாத்திரத்தில்
‘யுரேகா யுரேகா’ என்று கூவியபடி
வீதியில் இறங்கி ஓடினார் ஆர்க்கிமிடிஸ்.
****
02-08-2014
அவள் அணியும்
வண்ண வண்ண
கண்ணாடி வளையல்கள்
எனக்குள் எதிரொளித்து
வரைகின்றன
வண்ண வண்ண
கலைடாஸ்கோப் வடிவங்களை.
MANIதன் 