தொடரி

இந்த வருடம் பாதிக்கும் மேற்பட்ட வார இறுதி நாட்கள் வருவதும் போவதுமாக பயணத்திலேயே இருந்தன; பெரும்பாலானவை இரயில் பயணங்களே. பல மாதங்களுக்கு முன்பாகவே முன்பதிவு செய்த பயணச்சீட்டு, பயணத்திற்கு முந்தைய நாள் முன்பதிவு செய்த பயணச்சீட்டு(தக்கல், பிரீமியம் தக்கல்), அவசர அவசரமாக இரயில் புறப்படுவதற்கு சற்று முன் எடுக்கப்பட்ட பயணச்சீட்டு, பகல் நேரப் பயணம் என ஒவ்வொரு பயணமும் ஒவ்வொரு வகையில் மறக்க முடியாதவை. அதிலும் ஒருமாத காலம் தினமும் கால்ட்ரெயினில் சன்னிவேல் – சான்ஃப்ரான்சிஸ்கோ சென்ற அலுப்பான நாட்கள்; இதுவரை பள்ளி, கல்லூரி, அலுவலகம் என எதற்கும் இவ்வளவு தூரம்/நேரம் பயணித்ததில்லை. நிறைய பயணங்கள் மேற்கொண்ட வருடமாயிருந்தாலும் திட்டங்கள் ஏதுமில்லாமல் ஒட்டிக் கொண்டு லிட்டில் பேசின் மாகாணப் பூங்கா சென்றதைத் தவிர சுற்றுலா பயணம் என்ற ஒன்று வழக்கொழிந்து போய்விட்டது. கூடாரம் அடித்துத் தங்கியதாலும், இரண்டு நாட்களுக்கும் மேலாக கைபேசி என் கைகளில் இல்லாததினாலும்.அமைதி-ரம்மியமான சூழலினாலும் லிட்டில்பேசினில் முகாமிட்டது முக்கியமானதாகிறது. மொத்தத்தில் 2016 எனக்கு தொடர்ச்சியான தொடரிப் பயணங்களால் நிறைந்த ஆண்டு :-).img_20160831_090246-collage

Advertisements

செர்ரீ பறிக்க…

சென்ற ஞாயிற்றுக் கிழமை ப்ரண்ட்வுட்டுக்கு (Brentwood,CA) செர்ரீ பறிக்க சென்றிருந்தோம். பள்ளிக்கூடத்துக்கு சென்று வரும் வழியில் அவ்வப்போது நெல்லிக்காய், நவாப்பழங்கள் எல்லாம் பறித்துத் தின்றிருக்கிறேன். ஆனால் இப்படி பழங்களைப் பறித்து சாப்பிட, ஓர் ஊருக்கு செல்வதா? ‘அப்படி அங்கு என்ன விஷேஷம்?’ என்று விசாரித்தால், இந்த ப்ரண்ட்வுட் ஊரில் அறுவடைக் காலங்களில் ‘நீங்களே பறித்துக் கொள்ளலாம்’ (U-Pick) என்று ஒரு பொன்னான வாய்ப்பு தருகிறார்கள். அதாவது கனிகள் நிறைந்திருக்கும் மரங்களுள்ள தோட்டங்களுக்குள் உங்களை அனுமதிப்பார்கள். நீங்களாகவே அதைப் பறித்துத் தின்று பார்த்து ;-), வேண்டுமானால் வாங்கிக் கொள்ளலாம்(சில தோப்புகளில் கண்டிப்பாக நீங்கள் பறிக்கும் பழங்களை நீங்களே வாங்கிக் கொள்ள வேண்டும் என்று கட்டாயமும் உண்டு). இவ்வாறு நீங்களாகவே பறித்து வாங்கும் பழங்கள், வெளியே கடைகளில் வாங்கும் பழங்களை விட விலை குறைவாக இருக்கும். முதலில் நாங்கள் ஒரு தோட்டத்திற்குள் நுழைந்து, அங்கே லோக்குவாட்(Loquat)[சீன மொழியில் பீ-பா], ப்ளம், செர்ரீ மற்றும் ஆப்ரிகாட்(Apricot) போன்ற பழங்களை ருசித்து விட்டு, வரும் போது நாங்களே பறித்த ப்ளம் பழங்களை வாங்கிக் கொண்டோம். அடுத்ததாக ஒரு ஸ்ட்ராபெர்ரீ தோட்டத்துக்குள் புகுந்தோம். இங்கே பறிக்கும் பழங்களை கண்டிப்பாக வாங்க வேண்டும் என்பதால், வெறும் வேடிக்கையுடன் நிறுத்திக் கொண்டோம். கடைசியாக ஒரு செர்ரீ தோட்டத்துக்குள் நுழைந்து, திகட்டும் வரை செர்ரீ பழங்களைத் தின்றோம். தோட்டத்திலிருந்து வெளியேறும் போது செர்ரீக்களையும், கொஞ்சம் பீ-பாக்களையும் வாங்கிக் கொண்டோம். இப்படியாக மதிய உணவு, வெறும் பழங்களிலேயே முடிந்து விட, சாயங்காலம் வீடு திரும்பினோம். என்ன தான் வித விதமான பழங்களை அன்று நாங்கள் சுவைத்திருந்தாலும், நம் ஊரில் கட்டுக் காவலை மீறி கல்லால் வீழ்த்தி கிடைக்கும் கனிகளை சுவைக்கும் போது கிடைக்கும் ருசி மட்டும் கிடைக்கவேயில்லை… 😉