வேகத்தடைகள்

இரண்டு வாரங்களுக்கு முன்பு மிதிவண்டி பயிற்சியின் போது சற்றும் எதிர்பாராத விதமாக ஒரு நாய் குறுக்கே வந்தது; வண்டியைக் கட்டுப்படுத்த நேரமின்றி நாயின் மீது மோதி மிதிவண்டி ஒருபுறமும் நான் மறுபுறமும் சாலை நடுவே விழுந்தோம். நாடியில் நல்ல அடி; கை, கால்களிலும் விழுப்புண்கள். ஓரளவுக்குத் தேறி விட்டாலும், இன்று வரை மிதிவண்டியை இன்னும் தொடவில்லை. இரண்டு மாதங்களாகத் தொடர்ந்து வந்த ஒரு பழக்கம் சிறு வேகத்தடையால் முடங்கிப் போய் கிடக்கின்றது. பழக்கங்களை இந்த இடைவளிகள் சோம்பலால் நிரப்பி பாழாக்கி விடுகின்றன. ஒரே இடத்தில் கல் போல் நில்லாது, விரைவில் தடைகளைத் தாண்டி ஆறாய் ஓடட்டும் எந்தன் மிதிவண்டி.

2020

நாடடங்கு அறிவிக்கப்பட்டு பெரும்பாலான நாட்கள் வீட்டிற்குள்ளேயே கழிந்ததால், இயல்பு வாழ்க்கை பாதிக்கப்பட்டது. நேரம் ஒரு தடையல்ல என்பது நன்கு புரிந்தது; எவ்வளவோ நேரம் கிடைத்தாலும் சில செயல்களை அடுத்த கட்டத்திற்கு நகர்த்தவே முடியவில்லை. எல்லாவற்றிலும் ஒரு குறிப்பிட்ட காலத்துக்கு மேல் தொடர்ந்து செயலாற்ற இயலவில்லை; எனவே மனம் போன போக்கில் எல்லாவற்றையும் இஷ்டத்துக்கு முயற்சிக்க முடிந்தது.

புத்தகங்கள் ~ இந்த வருடம் 20 புத்தகங்களை வாசிக்க வேண்டும் என ஆரம்பித்து 15 புத்தகங்களே வாசித்திருக்கின்றேன். வாசித்தவற்றில் பல வருடங்களாக வாசிக்க நினைத்த ஒரு புளிய மரத்தின் கதை, புதுமைப்பித்தனின் பகடி எழுத்தில் நாரத ராமாயணம், தொ.பரமசிவனின் அழகர் கோயில், அலோக் கெஜ்ரிவாலின் Why I Stopped Wearing My Socks குறிப்பிடத்தகுந்தவை. கிடைத்த நேரத்தில் இன்னும் சில புத்தகங்களை வாசித்திருக்கலாம்.

திரைப்படங்கள் ~ மார்ச், ஏப்ரல் மாதங்களில் ஏகப்பட்ட படங்களைப் பார்த்தேன்; பின்னர் வேகம் தானாகவே குறைந்து விட்டது. பார்த்தவற்றில் ஈர்த்தவை Section 375, Dia, The Platform மற்றும் Article 15. இணையத் தொடர்கள், காணொலிகளையும் இதே கணக்கில் சேர்த்துக் கொள்வதா எனத் தெரியவில்லை; ஆனால் அவையும் கணிசமான அளவு நேரத்தை இவ்வருடம் ஆக்கிரமித்துக் கொண்டன. பார்த்த இணையத் தொடர்களில் Paatal Lok மற்றும் Mr.Robot(இன்னும் சில சீசன்கள் பாக்கி இருக்கின்றன) நன்றாக இருந்தன.

எழுத்து ~ மேலே குறிப்பிட்டபடி ஆகஸ்டு மாதம் அதிகபட்சமாக 11 பதிவுகள் எழுதினேன்; அவ்வளவு தான் அடுத்தடுத்த மாதங்களில் தொடர முடியாமல் 18 பதிவுகளுடனே வருடம் முடிந்து விட்டது. கடந்த பத்து வருடங்களில் பார்வையாளர்களின் வருகை இவ்வருடமே அதிகமாயிருந்திருக்கிறது. இது தொடர்ந்து எழுதத் தேவையான உத்வேகத்தை அளிக்கிறது. இந்த வருடம் நாடடங்கின் துவக்கத்தில் குறும்பட முயற்சியில் ஆரம்பித்து, காணொலிகளை(vlogging) எனது யூட்யூப் சேனலில் வெளியிட்டு வருகிறேன். காணொலிகளில் பெரும்பான்மையிடத்தை மகளதிகாரம் நிரப்பியிருக்கின்றது. அதில் தொழில்நுட்பம் சார்ந்த எனக்குத் தெரிந்த தகவல்களையும் பகிரலாம் என்று இருக்கிறேன். இவ்வருடம் ஒரு மின்னூல் வெளியிட்டிருந்தால் இன்னும் நன்றாக இருந்திருக்கும்.

மிதிவண்டி ~ ஓட்டமும் நடையுமாக இருந்தவன் மிதிவண்டி ஒன்றை வாங்கி கடந்த ஒரு மாத காலமாக ஊர் சுற்றி வருகிறேன். கிட்டத்தட்ட 15 வருடங்களுக்குப் பிறகு இப்போது தான் தொடர்ந்து மிதிவண்டி ஓட்டுகிறேன். இதுவரை ~500 கி.மீ வரை ஓட்டி இருக்கிறேன். நடக்கும் போதும், மிதிவண்டியில் போகும் போதும் ஒலியோடைகளையோ, பாடல்களையோ கேட்டபடி செல்கின்றேன். ஓர் ஒலியோடை துவங்கலாம் என்று யோசனை உள்ளது; 2021 முடிவில் பார்ப்போம் என்ன நடந்திருக்கிறதென்று.

இவை தவிர மொபைலில் வானையும், பறவைகளையும் படம் பிடிக்கப் பிடித்திருந்தது. குழந்தைகளுடன் அதிக நேரத்தை செலவிட்டது மகிழ்ச்சியாகவும், நிறைவாகவும் உள்ளது. ஒரு வழியாக 2020-ஐத் தள்ளியாகி விட்டது; கொரோனாப் பெருந்துயரிலிருந்து, 2021 அனைவரையும் மீட்கட்டும்! புத்தாண்டு வாழ்த்துகள்!

அடியேன்

சில வருடங்களாக நடைப்பயிற்சியை அவ்வப்போது கடைபிடித்து வருகிறேன். பெரும்பாலும் வருடத் துவக்கத்தில் எடுக்கப்பட்ட உறுதிமொழிக்காகவோ அல்லது கலந்து கொள்ளப் போகும் பத்து கி.மீ ஓட்டப்பந்தயத்துக்கான பயிற்சிக்காகவோ தொடரும் பயிற்சி, சில நாட்களிலேயே கைவிடப்படும். அதிகபட்சமாக உபயோகப்படுத்தும் செயலியில் நாளுக்கு ஒரு கி.மீ வீதம் ஒரு வருடத்தில் 365கி.மீ தூரத்தையாவது தொட வேண்டும் என்பதே, எட்ட முடியாத இலக்காக இருந்து வந்தது. இந்த வருடம் உறுதிமொழிகள் எதுவும் எடுக்காததினாலோ என்னவோ, இலக்கைத் தாண்டி மீட்டர் ஓடிக்கொண்டிருக்கின்றது. கொரோனா தொற்றால் நாடடங்கு அறிவிக்கப்பட்டு தனித்திருந்த நிலையில் ராபின் சர்மா-வின் The World-Changer’s Manifesto புத்தகத்தை வாசிக்க நேர்ந்தது. அதில் குறிப்பிட்டிருந்த 20/20/20 சூத்திரத்தின் படி எழுந்தவுடன் முதல் 20 நிமிடத்தை உடற்பயிற்சிக்காக ஒதுக்க ஆரம்பித்தேன். அடுத்தடுத்த 20 நிமிடங்களை வாசிப்பதற்காகவும், அன்றைய தின அலுவல்களைத் திட்டமிடவும் செலவிட்டேன். இதை அடுத்த நிலைக்கு எடுத்துச் செல்வதற்கு தோதாக, அலுவலகத்தில் தனிப்பட்ட மற்றும் குழுவினருக்காக குறைந்தது நாள் ஒன்றுக்கு 6000 அடிகள் வீதம் கிட்டத்தட்ட இரண்டு மாத காலம் கடக்க வேண்டும் என WalkerTracker செயலியில் சவால்கள் நடத்தப்பட்டன. பணி நேரம் போக மற்ற எல்லா நேரங்களிலும் நடக்க ஆரம்பித்தேன். இரண்டே மாதங்களில் கடந்த அடிகளைக் கணக்கிட்டுப் பார்த்தால் அவை 365கி.மீ-ஐத் தாண்டி ஓடி விட்டன. அலுவலகத்தில் நடத்தப்பட்ட சவால்கள் காலாவதியாகி விட்டாலும், இன்னமும் பயிற்சி தொடர்ந்து கொண்டுதான் இருக்கின்றது. அடியேன் கடந்த மாதம் ஒரு மிதிவண்டி வேறு வாங்கி ஊர் சுற்றிக் கொண்டிருக்கிறேன். அதைப் பற்றி வேறு ஒரு பதிவில் பார்ப்போம். கடந்து ஐந்து மாதங்களாக தொடர்ந்து பயிற்சி செய்வதால், 365*2 கி.மீத் தாண்டி மீட்டர் ஓடிக் கொண்டிருக்கின்றது. மகிழ்ச்சி!

ஓடிப் போன ஆமை

Tortoiseவீட்டை விட்டு ஓடிப் போன ஆமை, 74 நாட்களுக்குப் பின் கண்டுபிடிக்கப்பட்டதாக ஒரு செய்தி கண்ணில் பட்டது. ஓடிப் போன ஆமையை  யோசித்துப் பார்த்தேன்; கிட்டத்தட்ட இரண்டரை மாதங்கள்; வீட்டிலிருந்து எட்டு மைல் தொலைவிலேயே கண்டுபிடிக்கப்பட்டிருக்கிறது. ஆமையின் வேகத்தைக் கணக்கிலெடுத்துக் கொண்டால், அது அருகிலேயே எங்காவது தான் இருக்கும் என்று கணித்திருப்பார்கள். அப்படியே ஆமையின் வேகத்தைத் தானாகவே என் மனது தமிழ்த் தொலைக்காட்சி நெடுந்தொடர்களுடன் ஒப்பிட்டுக் கொண்டது. இதே போல இரண்டு-மூன்று மாதங்கள் கழித்து ஒரு தொடரைப் பார்த்தால், பெரிதாக கதை நகர்ந்திருக்காது; எதுவரைப் பார்த்திருந்தோமோ அதிலிருந்து தொடர்வது போலவே இருக்கும். உதாரணத்திற்கு நாடடங்கு நேரத்தில் சில மாதங்கள் நெடுந்தொடர்கள் ஒளிபரப்பப்படாமல் இருந்தனவல்லவா? அப்படியே தொடர்ந்து ஒளிபரப்பப்பட்டு இருந்தாலும், தொடரின் ஓட்டம் இந்த ஓடிப் போன ஆமையின் வேகத்தில் தான் நகர்ந்திருக்கும்; சில மாத இடைவெளியால் எந்தவொரு வித்தியாசமும் இருந்திருக்கப்போவதில்லை.

நாரத ராமாயணம்

511a0dvkg0Lபுதுமைப்பித்தனின்நாரத ராமாயணம்‘, குறுநாவல் அல்லது நீள்கதை வடிவிலான சிறிய புத்தகம். ஒரே மூச்சில் வாசித்து விடலாமென்றால், வரிக்கு வரி பகடி; சில வரிகளை மீண்டும் வாசித்துப் புரிந்து கொள்ள வேண்டியதாயிருக்கிறது. ராமனது காலத்திலிருந்து காலனிய இந்தியா வரை காலச்சக்கரத்தில் ஒரு விரைவுப் பயணம், நாரத ராமாயணம்.

 

 

 

 

வாசிப்பின் போது எடுத்த சில குறிப்புகள்:-

மேலும், சீதாபிராட்டியின் மீது ஒரு தனிக் கோபம் இருந்தது. அசோகவனத்திலிருக்கும் பொழுது, என்ன சொல்கிறோம் என்றுகூட கவனிக்காமல் அவள் அவசரப்பட்டுக் கொடுத்த வரத்தினால், தனக்குச் செத்துப் போகவும் வழி இல்லாமல் செய்துவிட்டதை, அவரால் மன்னிக்க முடியவே இல்லை.

சுமந்திரபாலனும், கிரந்தத்தை மேலாகப் பார்த்து, அது பகைவர் வந்தவுடன் நடத்தவேண்டிய யுக்திகளாக இருந்ததால், இப்பொழுது அதைப்பற்றிக் கவலை இல்லை என்று அரசாங்கப் புத்தகசாலையில் வைத்துப் பூட்டினான்.

சில கெட்டிக்கார அயோத்தி வாசிகள் தங்களிடம் இருந்த படைக்கலங்களின் இரும்பு வீணாவதைக்கண்டு, தோசைக் கற்களாகவும் இரும்புக் கரண்டிகளாகவும் உருக்கி வார்த்துக்கொண்டனர்.

ஒருநாள் பூராவாகவும், வெள்ளியம்பலத் தம்பிரான்களுடனும் அவர்கள் அரசாங்கத்துடனும் ‘டு’ போட்டுவிட்டால் வழிக்கு வந்துவிடுவார்கள் என்று நினைத்து, மூலைக்கு மூலை போய்ப் பேசி ஜனங்களைத் தன்வசப்படுத்த ஆரம்பித்தான்.

கட்டாயம் வாசியுங்கள் என்று பரிந்துரைக்கிறேன்!

எல்லையற்ற சுருள்

எல்லையற்ற சுருள்(Infinite Scroll) வடிவமைப்பு தற்போது பரவலாக எல்லா கருவிகளிலும், முகநூல், ட்விட்டர் உள்ளிட்ட சமூக வலைதளங்களிலும் காணப்படுகிறது. செயலியைத் திறந்தவுடன் சமீபத்திய அல்லது பயன்படுத்தப்படும் வழிமுறைக்கேற்ப சில செய்திகள் காட்டப்படும். கீழிலிருந்து மேலாக தொடு திரையைத் தள்ள(scroll) அடுத்ததாக சில செய்திகள் காட்டப்படும். நாம் செயலிக்குள்ளாகவே கட்டுண்டு கிடப்போம்; இப்படியாக முடிவிலியாய் சுருண்டு கிடக்கும் பெரும் நாகம் ஒன்று நம் நேரத்தை விழுங்கிக் கொண்டிருக்கும். முன்பெல்லாம் இவற்றையே பக்கவாரியாக பார்க்கும் போது, ஒரு கணக்கு வழக்கு இருக்கும்; பத்து பக்கங்களை இப்போதைக்குப் புரட்டுவோம் என்று நமக்குள் ஒரு எல்லைக்கோட்டை வரைந்து கொள்ளலாம். இந்த எல்லையற்ற சுருள் வடிவமைப்பில் அதே வழியைப் பின்பற்ற இயலாது. தற்போது நேர விரயத்தைத் தவிர்க்க, சமூக வலைதளங்களைப் பயன்படுத்தும் போது அவற்றிற்கென்று நேரம் ஒதுக்கி அப்போது மட்டும் பயன்படுத்துவது நன்று. அதற்காக நேர மேலாண்மைக்கான செயலி ஒன்றை கைபேசியில் நிறுவிக் கொள்ளலாம். நேரத்தின் மதிப்பை உணர்ந்து செலவிடுவோம்.

லென்ஸ்

ரெட்டைவால் குருவிகுழாயின் மேல் சிறு கரும்பறவை ஒன்று, ஏதோ ஒரு பறவை விட்டுச் சென்ற நிழல் போல நின்று கொண்டிருந்தது. அது காக்கை அல்ல என்று அறிவேன். ஆனால் என்ன பறவை என்று அறியேன். அதை ஒரு புகைப்படம் எடுத்துக் கொண்டேன். புகைப்படத்தைக் காட்டி அந்தப் பறவையைக் கண்டுபிடிக்க முயன்றேன்; சுற்றம் என்னை ஒரு சுற்று சுற்றி விட்டது. அதே புகைப்படத்தைக் கூகுளிடம் காட்டிக் கேட்டுப் பார்க்கலாம் என்று தோன்றியது. சுற்றி வளைத்துத் தேடிப் பார்த்தால், கூகுள் புகைப்பட சேவையிலேயே நேரடியாக அந்த வசதி இருப்பது தெரிய வந்தது. படத்தைப் பார்த்து அதில் பொதிந்திருக்கும் விஷயங்களை எடுத்து கூறும் கூகுள் லென்ஸ் வெளியாகி இரண்டு வருடங்களாகின்றது. புகைப்படங்களிலிருக்கும் சொற்களை நகலெடுப்பது, மொழிபெயர்ப்பது, இடங்களை, பொருட்களை கண்டறிவது என பலதரப்பட்ட செயல்களை செய்யவல்லது, கூகுள் லென்ஸ்; இது கூகுள் புகைப்பட சேவையோடும் இணைக்கப்பட்டுள்ளது. கூகுள் புகைப்பட செயலியில் அந்தப் புகைப்படத்தைத் திறந்து, லென்ஸ் ஐகானைக் கிளிக்கினேன்; ரெட்டைவால் குருவி என்று மின்னல் வேகத்தில் பதிலளித்து விட்டது. முயற்சித்துப் பாருங்கள்

மனிதனும் நதியும்

heraclitus1-2x

இன்று கண்ணில் பட்ட ஹெராகிளிடஸின் பொன்மொழி:-

ஒரு மனிதன் ஒரே நதிக்குள் இருமுறை இறங்குவது சாத்தியமல்ல, அது அதே நதியல்ல; அவனும் அதே மனிதனல்ல.

மாற்றம் ஒன்றே நிலையானது. ஓடிக் கொண்டேயிருப்பதால், நாம் பார்த்துக் கொண்டிக்கும் போதே நகரும் நதி அதே நதியல்ல; அதே போன்று மனிதனும் மாறிக் கொண்டேயிருக்கிறான். புறத்தோற்றத்தில் நிகழும் மாற்றங்களான வளர்ச்சி, முடி திருத்தம் இத்யாதி… இத்யாதி மட்டுமல்லாது சூழல், கற்று கொள்ளும் பாடங்கள், சக ஜீவராசிகள் என அனைத்தும் ஒரு சிறு அளவிலாது அகத்தளவில் மாற்றங்களை நிகழ்த்தியபடியே தான் உள்ளன. இவை வெளியில் தெரிவதில்லை என்பதை விட அவற்றை நாமே அறிவதில்லை என்பதே நிதர்சனம். இந்த பொன்மொழியில் சற்றே வரிகளை மாற்றி அமைத்துப் பார்த்தால்:-

ஆற்றுக்குள் இறங்கிய அதே மனிதனல்ல கரையேறுபவன்; கரை ஒட்டி ஓடும் ஆறும், அவன் இறங்கிய அதே ஆறல்ல.

நேற்றைய நான், இன்று இல்லை. இன்றைய நான், நாளை இல்லை. நாளை ஒருநாள் நானே இல்லை. தத்துவம்னா அப்படி தான்; கண்டுக்காதீங்க.

 

இஷ்டாவதானி

ஒரே நேரத்தில் பலதரப்பட்ட பணிகளைச்(multitasking) செய்யும் போது ஏற்படும் செயல்திறன் இழப்பு பற்றி இக்கிகாய் புத்தகத்தில் சில பக்கங்கள் பேசப்பட்டிருந்தன. அது கணிணிகளுக்கு வேண்டுமானால் ஒத்து வரும்; ஆனால் மனிதர்களுக்கு சரிப்பட்டு வராது. ஒரு நேரத்தில் ஒரு செயலில் மட்டுமே கவனத்தைக் குவிக்கும் போது அதை சிறப்பாகச் செய்ய முடியும் என்று விவரித்திருந்தார்கள். அப்போது அஷ்டவதானிகள் அப்படியே சிந்தனையில் வந்து போனார்கள்; அவர்களால் மட்டும் எப்படி ஒரே சமயத்தில் எட்டு செயல்களை செய்ய முடிகிறது என்று. அப்படியே நம்மைப் பற்றியும் யோசித்துப் பார்த்தேன். ஒரே நேரத்தில் செய்வது இருக்கட்டும்; அடுத்தடுத்தாவது எத்தனை செயல்களைச் செய்ய முடிகிறது; ஏதாவது ஒரு செயலையாவது முடிக்க முடிகிறதா? இப்படி எதையுமே முழுவதுமாக முடிக்காமல் multitasking என்ற பெயரில் தன் இஷ்டத்துக்கு இழுத்தடிக்கும் நபர்களை ‘இஷ்டாவதானி‘ என்றழைக்கலாமா என யோசித்து வருகிறேன். செய்யணுமே என்று கடனுக்கு அச்செயலை செய்பவர்கள், செய்முறை அறியாது அல்லது அறிய விழையாது இஷ்டத்துக்கு செய்பவர்கள் இத்யாதி… இத்யாதிகளையும் இஷ்டாவதானிகளாக் கொள்ளலாம்.

இயற்கை

‘இயற்கை’ எனக்குப் பிடித்தத் திரைப்படங்களில் ஒன்று. டூரிங் டாக்கீஸ் யூட்யூப் சேனலில் ‘சாய் வித் சித்ரா’ நிகழ்ச்சியில் ‘இயற்கை’ திரைப்படம் உருவான விதத்தை இன்று ஜனநாதன் எடுத்துரைத்தது நன்றாக இருந்தது. அதிலும் ‘வெண்ணிற இரவுகளை’ப் பற்றி சொன்ன விதம் அருமை ‘இல்ல சார் அப்படி ஒரு ஆள் கதை எழுதிருக்கான். வெண்ணிற இரவுகள்னு ஒரு கதை. தஸ்தயேவஸ்கினு ஒருத்தன். சும்மா உடம்பு சரியில்ல குழந்தைக்கி; 150ரூ-க்கி ஒரு கதை எழுதிருக்காரு. உலகமே வியக்கும் கதை சார். ரெண்டு பேருமே சிறந்தவன்; அதில யாரத் தேர்ந்தெடுப்பா? அப்டின்றது அந்தக் கதையின் சாராம்சம்‘. பார்த்த போது ‘வெண்ணிற இரவுகள்’ நாவலை நான் புத்தகக் கண்காட்சியில் தேடி அலைந்தது தான் ஞாபகத்துக்கு வந்தது. புத்தகத்தின் பேரைக் கேட்டதும் அப்படியே மேலும் கீழும் பார்ப்பர். அடுத்ததாக யார் எழுதியது என்று கேட்பர். நான் கஷ்டப்பட்டு தஸ்தயேவ்ஸ்கினு சொல்வேன். அவர்கள் இல்லையென்று கையை விரிப்பர். பின்னர் ஒரு கடையில் தஸ்தயேவ்ஸ்கியின் குறுநாவல்கள் புத்தகத்தில் வெண்ணிற இரவுகளைப் பார்த்து வாங்கி வந்து சேர்ந்தேன்.  தஞ்சை பின்னணியில் அவர் சொல்லப் போகும் கதை எப்படி இருக்கும்னு யோசித்துக் கொண்டிருக்கிறேன்; பார்ப்போம்.