ஓகே கூகுள் – 5 மொழியாக்கம்

மொழி தப்பினவன் வழி தப்பினவன்

பத்து வருடங்களுக்கு முன்பு, பெங்களூர் வந்த போது தமிழைத்(கொஞ்சம் ஆங்கிலம்) தவிர வேறு எதுவும் அறியேன். பெரும்பாலானாவர்களுக்கு தமிழ் தெரியும் என்பதால் தாராளமாக தமிழை வைத்துக் கொண்டு இங்கே வண்டியை ஓட்டலாம். இருப்பினும் இருப்பிடத்தின் மொழியை அறிந்திருத்தல் நலம் என்பதால் கொஞ்சம் கொஞ்சமாக கன்னட வார்த்தைகளைக் கற்க தொடங்கினேன். முதலில் கற்றுக் கொண்டது ‘கன்னடா கொத்தில்லா‘ (கன்னடம் தெரியாது). இதை நான் அவ்வப்போது பிரயோகித்து வர, ஒருநாள் அலுவலக வாயிலில் ஒரு காவலர் ஏதோ கேட்க, வழக்கம் போல் ‘கன்னடா கொத்தில்லா’ என அவிழ்த்து விட்டேன்; அவரும் கொத்தில்லா எனக் கூறி விழிக்க, என்னைப் போலவே அவரும் வேற்று மொழிக்காரர் எனப் புரிந்து கொண்டு அடையாள அட்டையைக் காண்பித்து விட்டு நடையைக் கட்டினேன். இதே மாதிரி வேற்று மொழிக்காரர்களுடன் உரையாடும் போது சில வேடிக்கையான அனுபவங்கள் ஒவ்வொருவருக்கும் நிச்சயம் இருக்கும். இப்படி தான் நண்பர் ஒருவர் பிஸ்கட் பாக்கெட் வாங்கி விட்டு எவ்வளவு என்று கேட்டிருக்கிறார்; கடைக்காரர் ‘ஹன்ரடு’ என்று கூற, ‘பகல் கொள்ளையா இருக்கே! ஒரு பிஸ்கட் பாக்கெட் நூறு ரூபாயா?’ என்று நினைத்துக் கொண்டே,  நண்பர் பிஸ்கட்டை திருப்பி கொடுத்து விட்டு திரும்பி பாராமல் வந்து விட்டார். கடைக்காரருக்கு ஒன்றும் விளங்கியிருக்காது. ஏனெனில் அவர் சொன்ன விலை ‘ஹன்னெரடு’ (பன்னிரெண்டு) ரூபாய். சவாலாக விளங்கினாலும், சிறந்த அனுபவங்களைக் கொடுத்தாலும், மொழி தெரியாத ஊரில் திரிவது என்பது கண்களைக் கட்டி காட்டுக்குள் விட்ட கதை என்பதை மறுக்க முடியாது. அதுவும் வேற்றுமையில் ஒற்றுமை காணும் இந்தியாவில் கேட்கவே வேணாம்; மாநிலத்தைத் தாண்டினால் போதும்; தலயும் புரியாது, வாலும் புரியாது. மொழிபெயர்ப்பாளர் உதவியின்றி  இத்தகைய மொழி வேறுபாடுகளைக் களைவது எங்ஙனம்?

அறிமுகம்

GoogleTranslateமொழி வேறுபாடுகளால் கூறு போடப்பட்டு விரிசல்கள் விழுந்திருந்த இடங்களில், ஒட்டு போட்டு, ஒற்றை மருந்தாய் மலர்ந்திருக்கின்றது, கூகுள் மொழியாக்கம். டெஸ்க்டாப், ஸ்மார்ட்போன் என எதிலிருந்தும் பயன்படுத்தும் வசதி, எப்பேர்பட்ட உரையையும் மொழியாக்க உதவுவது, ஆஃப்லைனிலும் கை கொடுப்பது, 100-க்கும் மேற்பட்ட மொழிகளை மொழியாக்கம் செய்ய உதவுவது, எந்த ஒரு செயலியிலும் மொழியாக்கத்தை பயன்படுத்தும் வசதி ஆகியவற்றால் கிட்டத்தட்ட ஒரு மொழிபெயர்ப்பாளரை பாக்கெட்டிலேயே வைத்துக் கொண்டு சுற்றுவதற்கு சமமாய் வளர்ந்து வருகிறது, கூகுள் மொழியாக்கம்.

சிறப்பம்சங்கள்

  • தட்டச்சினால் அவ்வார்த்தை விரும்பும் மொழியில் மொழியாக்கம் செய்து காட்டப்படும்.
  • பேசுவது விரும்பும் மொழியில் மொழியாக்கம் செய்து சொல்லப்படும்.
  • படங்களிலுள்ள வேற்று மொழி வார்த்தைகள், மொழியாக்கம் செய்து காட்டப்படும்.
  • ஸ்மார்ட்போனிலுள்ள காமிராவின் வழியே பார்க்கும் போது உடனடி மொழியாக்கங்கள் தென்படும்.
  • விரல்களால் எழுதும் எழுத்துக்கள் மொழியாக்கம் செய்து காட்டப்படும்.
  • ஆஃப்லைனும் இயங்கும் வசதி

மேற் கூறிய அம்சங்களில் எவை எவை உங்களுக்குத் தேவையான மொழிகளுக்கு வழங்கப்படுகின்றன என்பதை அறிய இங்கே சொடுக்கவும்.

தெரிந்து கொள்வோம்

பத்தாவது பிறந்தநாளை ஒட்டி கடந்த வருடம் (ஏப்ரல் 18, 2016) கூகுள் மொழியாக்கத்தைப் பற்றி வெளியான சில சுவாரசியமான புள்ளிவிவரங்கள்:-

  • 500 மில்லியன் பயனர்கள் கூகுள் மொழியாக்கத்தை உபயோகிக்கிறார்கள்.
  • அதிகமாக மொழியாக்கம் செய்யப்பட்ட மொழிகள்:- ஆங்கிலத்திலிருந்து ஸ்பானிய, அரேபிய, ரஷ்ய, போர்ச்சுகீசிய, இந்தோனேஷிய மொழிகளாகும்.
  • ஒருநாளைக்கு 100 பில்லியன் வார்த்தைகளுக்கும் மேல் மொழியாக்கம் செய்யப்படுகின்றன.
  • கூகுள் மொழியாக்கத்தை பயன்படுத்துபவர்களில் 92% அமெரிக்க நாட்டவர் அல்லாதோரே. பயனர்களில் பிரேசில் நாட்டினர் முதலிடம் வகிக்கின்றனர்.
  • வேர்டு லென்ஸ் – வேற்று மொழி வார்த்தைகளை நமக்குத் தெரிந்த மொழியில் காட்டும் மாயக் கண்ணாடி.
  • அதிகம் மொழிபெயர்க்கப்பட்ட வாக்கியங்கள்:- எப்படி இருக்கீங்க?, நன்றி!, நான் உன்னை விரும்புகிறேன்.

திரைக்குப் பின்னால்

புதிதாக ஒரு மொழி கற்றுக் கொள்ளும் போது அம்மொழிச் சொற்களை முதலில் அறிந்து கொள்ள வேண்டும்; பின்னர் இலக்கணம்; அப்புறம் வார்த்தைகளை இணைத்து வாக்கியம் என படிப்படியாக முன்னேற வேண்டும். தட்டுத் தடுமாறி நாம் முன்னேறும் போது விதிவிலக்குகள் என சில நம் வழியை மறைத்துக் கொண்டு நிற்கும். உதாரணத்திற்கு, தமிழின் ‘ப’, கன்னடத்தில் ‘ஹ’-வாக இருக்கும் (பால்=ஹாலு) . நானே கண்டுபிடிச்ச இவ்விதிப்படி, பேசிக் கொண்டிருக்கும் போது ‘பதினொன்றை’ => ‘ஹதினொந்து’ என்று அடித்து விட்டேன்; முதலில் திருதிருவென்று விழித்து விட்டு பின்னர் தான் புரிந்து கொண்டனர்; அதை ‘ஹன்னொந்து’ என்று சொல்ல வேண்டுமாம். இதே மாதிரி இலக்கணம் மற்றும் சொற்களஞ்சியத்தின் அடிப்படையில் ஒவ்வொரு மொழியிலிருந்தும் பிறிதொன்றுக்கு மொழியாக்கம் செய்யும் நிரல் எழுதி, பராமரிப்பதென்பது தடைகள் நிறைந்த வழியாகும். அதற்கு மாற்றுவழி தான் ‘புள்ளிவிவர இயந்திர மொழிபெயர்ப்பு‘. இயந்திரத்திற்கு  லட்சக்கணக்கான மொழிபெயர்க்கப்பட்ட உரைகளையும், அவற்றின் மூல உரைகளையும் உள்ளே தள்ள வேண்டும். அவற்றையெல்லாம் கரைத்துக் குடிக்கும் இயந்திரம், உரைகளிலிருந்து மாதிரிகளை பெயர்த்து எடுத்து சேகரித்து வைத்துக் கொள்ளும். இதுவே திரும்ப திரும்ப பல முறை செய்யப்படுகின்றது. அடுத்து இயந்திரத்திடம் ஏதாவது ஒரு வாக்கியத்தைக் கொடுக்க, சேர்த்து வைத்த மாதிரிகளிலிருந்து அழகாய் கோர்த்து மொழிபெயர்க்கப்பட்ட வாக்கியத்தை கண் இமைப்பதற்குள் தூக்கி எறியும். உரைகளின் எண்ணிக்கையும், தரமும் மொழியாக்கத்தின் தரத்தில் முக்கிய பங்கு வகிக்கின்றன. இதான் ‘புள்ளிவிவர இயந்திர மொழிபெயர்ப்பு’. இன்னும் சிறப்பான மொழியாக்கத்தைத் தரும் பொருட்டு நவம்பர், 2016-லிருந்து கூகுளது புதிய நியூரல் இயந்திர மொழிபெயர்ப்பு அமைப்புக்கு மாறி விட்டது கூகுள் மொழியாக்கம். இதனால் மனித-இயந்திர மொழியாக்கத்துக்கிடையேயான இடைவெளி மேலும் குறைகிறது.

google-maps-comedy--6964763323

சமீபத்தில் கூகுள் வரைபடத்தில் ‘Amma’s Mess’ என்பதை ‘அம்மாவின் அலங்கோலம்‘ என மொழிபெயர்த்து இருந்ததை கலாய்த்து மீம்கள் வெளியாகின; அது ‘அம்மா உணவகம்’ என்று தற்போது திருத்தப்பட்டுவிட்டது. இதே மாதிரி பிழைகள் ஏதேனும் இருப்பின், அவற்றைத் திருத்த கூகுள் மொழியாக்க சமூகத்தில் தெரிவிக்கலாம்.

பி.கு:- என்ன தான் செமயா மொழி பெயர்த்தாலும் கூகுள் மொழியாக்கம், ஒரு மொழிபெயர்ப்பாளருக்கு மாற்றாகிடாது; ஆகவே மொழியாக்கத்தைப் பொருத்தமான இடத்தில் மட்டும் உபயோகிக்கவும்.

 

– தொடரும்

Advertisements

ஓகே கூகுள் – 4 புகைப்படம்

ஒரு புகைப்படம் ஆயிரம் வார்த்தைகளுக்குச் சமம்.

தாத்தா, பாட்டி காலத்தைய கருப்பு-வெள்ளை புகைப்படங்கள் நினைவிருக்கிறதா? மொத்தமே ஒன்றிரண்டு புகைப்படங்கள் தான் எடுக்கப்பட்டிருக்கும், அவர்தம் வாழ்நாட்களிலேயே.  அதிலொன்று சுவரில் தொங்கவிடப்பட்டிருக்கும்; மற்றவை இரும்புப் பெட்டிக்குள் பத்திரப்படுத்தப்பட்டிருக்கும். அப்போதெல்லாம் அரிய புகைப்படங்கள் என்று தான் பத்திரிக்கைகளில் பிரபலங்களின் படங்கள் வெளியாகும். அடுத்ததாக ஸ்டுடியோவில் எடுத்த புகைப்படங்கள், திருமண மற்றும் இதர நிகழ்ச்சிகளில் எடுக்கப்படும் புகைப்படங்கள் என பல வண்ணப்படங்கள் வலம் வந்தன. டிஜிட்டல் கேமிராக்களின் வருகை எடுக்கப்படும் புகைப்படங்களின் எண்ணிக்கையை கணிசமாக உயர்த்தின. ஒரு சிலர் தான் டிஜிட்டல் கேமிராக்கள் வைத்திருப்பார்கள்; அதை இரவல் வாங்கி படங்களாக எடுத்துத் தள்ளி, அவற்றை கணிணியில் சேமித்து, கேமிராவிலிருந்து நீக்கி விட்டு திருப்பி கொடுக்க வேண்டும்; கொடுத்தவருக்கு நினைவிலிருந்தால், திருப்பி கேட்டால். நான் முதன் முதலாக வாங்கிய புகைப்படக்கருவி கேனான் பவர் ஷாட் A590 IS; கடைசியாக வாங்கியதும் அதே தான் 😉 ‘சும்மா போட்டோ எடுத்திட்டே இருக்காத, ஆயுசு குறஞ்சுரும்’ என்று அவ்வப்போது எச்சரிக்கை மணி அடிப்பவர்களும் உளர். போட்டோ பிடித்தால் போய் சேர்ந்துடுவோம் என நம்பும் கிராமத்து மக்களைக் கருவாக கொண்டு எடுக்கப்பட்டு, ஹிட்டடித்த ‘முண்டாசுப்பட்டி’ திரைப்படம் உங்களுக்கு நினைவிருக்கலாம். இப்போதோ புகைப்படம் எடுக்காத நாட்களை விரல் விட்டு எண்ணி விடலாம்.  நான் எடுத்த உருப்படியான புகைப்படங்களில் ஒன்றை சந்தடி சாக்கில் இந்தப் பதிவில் இணைத்து விடுகிறேன்; ஒரு விளம்பரம் … 🙂

Abert's Squirrel

Abert’s Squirrel

பட்டாம்பூச்சியை விரட்டி விரட்டி பிடித்துக் கொண்டிருந்தது அன்றைய தலைமுறை; அதையே உருண்டு புரண்டு ஸ்மார்ட்போனில் படம் பிடித்துக் கொண்டிருக்கிறது புதிய தலைமுறை.

அறிமுகம்

google-photosபுகைப்படங்களை பகிர்வதற்காகவும், சேமித்து வைப்பதற்காகவும்  மே, 2015 துவங்கப்பட்ட கூகுள் புகைப்பட சேவை, தற்போதைய நிலவரப்படி (ஆகஸ்டு, 2017) மிக குறுகிய காலத்திற்குள் பில்லியன் பதிவிறக்கங்களைத் தாண்டி வெற்றிகரமாக ஓடிக் கொண்டிருக்கிறது. இவ்வெற்றிக்கான முக்கிய காரணிகள் இலவச சேமிப்பு வசதி, தானாகவே புகைப்படங்களை ஒழுங்குபடுத்துவது, தானாகவே சேமித்து வைக்கும் பழக்கம், அதிவிரைவான அறிவான தேடும் வசதி, ஆல்பங்களை உருவாக்கி நண்பர்களுடன் பகிரும் வசதி, அவ்வப்போது நினைவுகளை மீட்டெடுக்கும் படியான புகைப்படங்களை அனுப்புவது மற்றும் புகைப்படங்களைத் தொகுப்பதற்கான கருவிகள்.

தள வரலாறு

Picasa-Logo2002-ம் ஆண்டு, லைஃப்ஸ்கேப் நிறுவனம் உருவாக்கிய படங்களைப் பார்க்க/ஒருங்கிணைக்க/தொகுக்க/பகிர்வதற்கான இணையதளமே, பிகாஸா. ஸ்பானிய ஓவியர் பாப்லோ பிகாஸோ மற்றும் புகைப்படங்களின் உறைவிடம் (pic – mi casa[ஸ்பானிய மொழியில் ‘எனது வீடு’]) என வார்த்தைகளின் ஜாலமே ‘பிகாஸா’வின் பெயர்க் காரணம். அதன் குறுகியகால வளர்ச்சியைப் பார்த்து 2004-ம் ஆண்டு கூகுள் அதனை வாங்கி, இலவச சேவையாக வழங்கியது. தேவையான படங்களைத் தேடிக் கண்டுகொள்ளவும், அவற்றை இனம்பிரித்து நேர்த்தியாக ஒழுங்குபடுத்திக் காட்டுவதற்கும் பிகாஸா உதவிகரமாக இருந்தது. 2006-ம் ஆண்டு புகைப்படங்களில் உள்ள இடங்களையும், முகங்களையும் வைத்து புகைப்படங்களைத் தேடுவதற்கான தொழில் நுட்பங்களுக்காக நெவன் விஷன் எனும் நிறுவனத்தை கூகுள் வாங்கியது; அத்தேடல் வசதி பிகாஸா இணைய ஆல்பத்தில் செப்டம்பர், 2008 அறிமுகப்படுத்தப்பட்டது. அது போக ஜியோடேக்கிங் மூலம் எவ்விடத்தில் அப்படம் எடுக்கப்பட்டது எனும் தகவல்களையும் படத்துக்குள் திணித்து  வைக்க முடியும். புகைப்படங்களுக்கென ஒரே ஒரு சேவையில் மட்டுமே தனது ஒட்டு மொத்த கவனத்தையும் கூகுள் செலுத்த விரும்பியதால், மே 2016 பிகாஸா இணைய ஆல்பம் நம்மை விட்டுப் பிரிந்தது. கூகுள் புகைப்படம் அவ்விடத்தை நிரப்பி, அசுர வேகத்தில் வளர்ந்து வருகிறது.

தெரிந்து கொள்வோம்

  • தானாக சேமித்தல் : நமது ஸ்மார்ட்போன் தொலைந்து போனாலோ, உடைந்து போனாலோ முதல் கவலை, ‘அதிலிருக்கும் அரிய புகைப்படங்கள் போச்சே !’ என்பது தான். கூகுள் புகைப்படம் எடுக்கும் புகைப்படங்களை தானாவே சேமித்து வைப்பதால், அதே பயனர் கணக்குக்குள் வேறொரு ஸ்மார்ட்போன் மூலம் நுழைந்தால் கூட நம் புகைப்படங்கள் அப்படியே அழியாமல் இருக்கும்.
  • தேடல் : கூகுள் புகைப்படத்தின் தேடல் வசதி அதிபுத்திசாலி; அதிவேகமானதும் கூட. ‘மரம்’ என்று தட்டச்சினால் எந்தெந்த புகைப்படங்களில் மரம் இருக்கிறதோ அவற்றையெல்லாம் எடுத்துக் காட்டி விடும்; ‘மதுரை’ என்று அடித்தால் மதுரையில் எடுத்த புகைப்படங்களை எல்லாம் காட்டும்; இதற்காக நாம் புகைப்படங்களை டேக்(tag) செய்திருக்க வேண்டிய அவசியமில்லை.
  • பரிந்துரையின் பெயரில் பகிர்தல் : புகைப்படங்களைப் பகிர்வதற்கு  முதலில் அப்புகைப்படத்திலுள்ளவர்களை  பரிந்துரைக்கிறது.
  • கூட்டு ஆல்பம் : ஒரு பயணத்தில்/இடத்தில்/நிகழ்வில் பலர் தங்களது புகைப்படக் கருவிகளில் எடுக்கும் புகைப்படங்களை அனைவரும் ஒரே ஆல்பத்தில் போட்டு, தங்களுக்குள் பகிர்ந்து கொள்ள உதவுகிறது.
  • புகைப்படங்களை ஒழுங்குபடுத்துதல் : புகைப்படங்களை தேதி வாரியாகவும், இடம்-பொருள்-மனிதர் என பலவாறாக வகைப்படுத்தியும் தானாகவே ஒழுங்குபடுத்திக் காண்பிக்கிறது.

திரைக்குப் பின்னால்

கூகுள் புகைப்படத்திற்கு பின்னால் அந்நிறுவனத்தின் செயற்கை நுண்ணறிவு, தரவுச் செயலாக்கம், இயந்திர கற்றல் ஆகியவற்றில் அதற்குள்ள அனுபவமும், தீராத ஆர்வமுமே காரணங்கள். உதாரணத்திற்கு 5000 புகைப்படங்களை 5 வெவ்வேறு புகைப்படக் கலைஞர்களிடம் கொடுத்து மெருகேற்றி, அந்த புகைப்படங்களை எல்லாம் உள்ளீடாக செலுத்துவர். கொடுக்கப்பட்ட தரவுகளிலிருந்து அசல் புகைப்படங்களுக்கும், மெருகேற்றப்பட்ட புகைப்படங்களுக்கும் உள்ள வித்தியாசங்கள் என்னென்ன? புகைப்படங்களில் எவையெல்லாம் செம்மையாக்கப்பட்டிருக்கின்றன? என கற்றுக் கொள்ளும் இயந்திரம், அதற்குத் தக நின்று நாம் கொடுக்கும் புதியதொரு புகைப்படத்தை சிறந்த புகைப்படக் கலைஞருக்கு நிகராக மெருகேற்றிக் காட்டும். இப்படியான வேலைகளுக்கு சாதாரணக் கணிணிகளை பயன்படுத்தினால் ஆமை வேகத்தில் தான் தீர்வுகள் கிடைக்கும் என்பதால், குவாண்டம் இயங்கியலின் அடிப்படையில் உருவாக்கப்பட்டுள்ள அதிவேக குவாண்டம் கணிணிகள் பயன்படுத்தப்படுகின்றன. இரு எண்ணியல் முறையின் அடிப்படைக் கட்டுமானப் பொருளான ‘பிட்’ என்பது 0 அல்லது 1 எண் மதிப்பைக் கொண்டிருக்கும். ஆனால் குவாண்டம் முறையின் அடிப்படைக் கட்டுமானப் பொருளான ‘க்யூபிட்’ ஒரே சமயத்தில் 0, 1, 0 மற்றும் 1-ன் இருநிலை இருப்பு என பல மதிப்புகளைக் கொண்டிருக்கும். ஒரே சுத்தலா இருக்கா? இப்படி சுத்தி சுத்தி தான், புகைப்பட சேவையின் சிறப்பியல்புகள் குவாண்டம் வழிமுறைகளாலும், இயந்திரக் கற்றலாலும் சாத்தியமாகியிருக்கின்றன.

செல்ஃபி, செல்ஃபி எடுப்பது மாதிரி செல்ஃபிக்குள் செல்ஃபி என செல்ஃபி மயமாக சுற்றிக் கொண்டிருக்கும் உலகிற்கு, புகைப்பட தின வாழ்த்துகள்!

– தொடரும்

ஓகே கூகுள் – 3 ஜிமெயில்

விளக்கப்படாத கனவு திறக்கப்படாத கடிதம் போன்றது.

‘நலம். நலமறிய அவா.’ என்று துவங்கும் கடிதங்களை வாசித்து எவ்வளவு நாட்களாகின்றன. ‘ஊருக்கு போய்ட்டு லெட்டர் போடு’ என்று சொல்லி தான் வெளியூர் செல்லும் உறவுகளையும், நண்பர்களையும் வழியனுப்பியே வைப்பார்கள். அப்போதெல்லாம் எந்த ஒரு செய்தியானாலும் தொலை தூரங்களைக் கடந்து பரிமாறிக் கொள்ள கடிதங்களே வழிவகை செய்தன. அந்தந்த ஏரியா போஸ்ட்மேன்களுக்கு அந்தந்த பகுதியிலுள்ள அத்தனை முகவரிகளும் அத்துப்படியாக இருக்கும். சும்மா தபால்காரரைப் பார்க்கும் போதெல்லாம், ‘எனக்கு எதுவும் கடுதாசி வந்துருக்கா?’ என்று திரும்ப திரும்ப கேட்டு கடுப்பேத்துபவர்களும் உண்டு. ‘காதலித்துப் பார் தபால்காரன் கடவுளாவான்‘ என்று வைரமுத்து எழுதிய வரிகளிலிருந்து கூட அறிந்து கொள்ளலாம், கடிதப் போக்குவரத்தே பிரதானமாக இருந்த அந்த காலக்கட்டத்தை. தபால்தலைகள் சேகரித்து வைப்பதென்பது ஒரு பிரபலமான பொழுதுபோக்கு. அதன் பின்னர் தனியார் அஞ்சல் சேவைகள், தொலைபேசி, கைபேசி, மின்னஞ்சல்களின் வருகை கடிதப் போக்குவரத்தைக் கணிசமான அளவுக் குறைத்து விட்டன. அலுவலகப் பணிக்காகட்டும், சொந்த விஷயங்களுக்காகட்டும் கண் சிமிட்டும் நேரத்தில் பெறுநருக்கு செய்திகளைக் கடத்தும் மின்னஞ்சல் அன்றாட அலுவல்களில் தற்போது முக்கிய பங்கு வகிக்கிறது.

அறிமுகம்

gmail_logoஅழைப்பிதழ் இருந்தால் மட்டும் பயனர் கணக்குத் துவங்க முடிந்த பீட்டா வெளியீடாக ஜிமெயில் வெளியான போது கல்லூரியில் படித்துக் கொண்டிருந்தேன். PP லேபில் சீனியர்கள் ‘ஜிமெயில் அழைப்பிதழ்கள் இருக்கின்றன யாருக்காவது வேண்டுமா?’ என்று கேட்ட போது, இரண்டு கைகளையும் தூக்கிக் கொண்டு ஒன்னுக்கு ரெண்டாக ஜிமெயிலில் பயனர் கணக்குகள் துவங்கியது நினைவிலிருக்கிறது. 1GB சேமிப்பு வசதி(தற்போது 15GB) , உரையாடற் பார்வையில் மின்னஞ்சல்களை ஒழுங்குபடுத்துவது என வெளியான போதே பலரது கவனத்தை ஈர்த்தது ஜிமெயில். முதன்மையானவை, சமூகம், விளம்பரங்கள், அறிவிப்புகள் என தரம் பிரித்து தனித்தனியாக மின்னஞ்சல்களைப் போட்டு வைப்பது; இணைப்புகளை ஜிமெயிலுக்குள்ளாகவே பார்க்கும் வண்ணம் அமைத்திருப்பது; கண்கவர் தீம்கள்; இன்பாக்ஸிலிருந்தே மின்னஞ்சல்களைத் திறக்காமலே, பார்சல்களை டிராக் செய்ய, தயாரிப்புகளுக்கு மதிப்புரை வழங்க, நிகழ்வுகளுக்குப் பதிலளிக்க முடிவது;  பயன்படுத்துவதற்கு எளிதான, இன்பாக்ஸைப் பார்த்துக் கொண்டே புதிய செய்திகளை எழுதும் வசதி என எக்கச்சக்க அம்சங்களைத் தன்னகத்தே கொண்ட ஜிமெயில், ஒரு பில்லியன் பதிவிறக்கங்களை முதன் முதலாக பதிவு செய்த ஆன்ட்ராய்டு செயலி என்பதில் வியப்பேதுமில்லை. ‘@yourcompany.com’ எனும் தனிப்பயன் மின்னஞ்சல் முகவரிகளுடன் வணிகத்திற்காகவும் ஜிமெயில் பயன்படுத்தப்பட்டு வருகிறது. 2014-ல் எடுக்கப்பட்ட கணக்கின் படி, 60% நடுத்தர கம்பெனிகளும், 92% ஸ்டார்ட்அப் கம்பெனிகளும் ஜிமெயிலையே பயன்படுத்தி வருகின்றனர். அப்பவே அப்படினா, இப்ப?

தள வரலாறு

நிறுவனத்தின் உற்பத்தி திறனை அதிகரிக்கும் புதுமையான கண்டுபிடிப்புகள் கூகுளில் வரவேற்கப்படுகின்றன. அதற்காக ஊழியர்கள் தங்கள் வேலை நேரத் தில் 20% நேரத்தை செலவழித்துக் கொள்ளலாம். அப்படி உருவான சிறந்த படைப்புகளில் ஒன்று தான், ஜிமெயில். கூகுள் குரூப்ஸ் உருவாக்கத்தில் ஈடுபட்டிருந்த பால் புஹை முதல் கட்ட பணிகளை முடிக்கும் தருவாயில்,  ‘இதே மாதிரி மின்னஞ்சலுக்கு ஒரு சுவாரஸ்யமான திட்டப்பணி உள்ளது. செய்கிறீர்களா?’ என்று கேட்க,  புஹை அதற்காகவே காத்திருந்தது போல, முன்னதாகவே தனக்குள் வைத்திருந்த மின்னஞ்சல் மென்பொருள் யோசனைகளுக்கு செயல் வடிவம் கொடுக்க ஆரம்பித்தார். கூகுள் குரூப்ஸ் நிரலிலிருந்து ஆரம்பித்தவருக்கு, முதல் பதிப்பைத் தயார் செய்ய ஒரே ஒரு நாள் தான் ஆனதாம்.  சேமிப்புக்கும், தேடலுக்கும் முக்கியத்துவம் கொடுக்கப்பட்டு உருவாக்கப்பட்ட ஜிமெயில் முதலில் கூகுள் பணியாளர்களின் பயன்பாட்டுக்கு மட்டும் வெளியிடப்பட்டது. கூகுள் நிறுவனத்துக்குள்ளேயே வலம் வந்து கொண்டிருந்த ஜிமெயில் ஏப்ரல் 1, 2004 அன்று வெளியே பீட்டா பதிப்பாக காலை வைத்தது. அதுவரை சின்ன சின்ன ரோல்களில் தலை காட்டிக் கொண்டிருந்த ஜாவாஸ்கிரிப்ட்டை சூப்பர் ஹீரோ அஜாக்ஸாக மாற்றியது ஜிமெயில் தான். கூகுளிலிருந்து 2006-ம் ஆண்டு வெளியேறிய பால் புஹை, ஃபிரண்ட்ஃஈட் நிறுவனத்தைத் துவங்கினார்; 2009-லேயே அதை ஃபேஸ்புக் ஒரே அமுக்காக அமுக்கிக் கொண்டது என்பதெல்லாம் கிளைக் கதைகள். பிப்ரவரி 7, 2007 தனது பீட்டா சோதனைக் காலத்தை முடித்துக் கொண்டு ஜிமெயில் வெளியானது. பத்து வருடங்களுக்கும் மேலாக மின்னஞ்சலில் தன் முத்திரையை பதித்து, மின்னஞ்சல் தலையாக நம் கண் முன்னேயே உருமாறியிருக்கிறது ஜிமெயில்.

தெரிந்து கொள்ளுங்கள்

  • பயனர் பெயர்களில் விருப்பத்திற்கேற்ப புள்ளிகளை சேர்த்தோ, நீக்கியோ எழுதலாம். ஆக உங்களது பயனர் பெயர் ‘okaygoogle@gmail.com’ என்று வைத்துக் கொண்டால்,  ‘okay.google@gmail.com’,  ‘ok.ay.google@gmail.com’ என எந்த முகவரிக்கு அனுப்பினாலும் மின்னஞ்சல் உங்களுக்கு வந்து சேரும்.
  • “@”-க்கு முன்னே, ‘+’-க்கு பின்னே ஏதாவது வார்த்தைகளைப் போட்டு உங்கள் பயனர் பெயருக்குத் தேவைகளுக்கேற்றவாறு செல்லப் பெயர்களை ‘+’ முகவரிகளாக வைத்துக் கொள்ளலாம். உதாரணத்திற்கு ‘okaygoogle+blog@gmail.com’, ‘okaygoogle+news@gmail.com’ என எந்த முகவரிக்கு அனுப்பினாலும் உங்கள் மின்னஞ்சலுக்கு வந்து சேரும்; முகவரியை வைத்து தரம் பிரித்து, வடிகட்டி வாசித்துக் கொள்ளலாம். இதன் மூலம் எந்த முகவரிக்கு ஸ்பேம் மின்னஞ்சல் வந்துள்ளதோ அதை வைத்து எந்த இணையதளம் உங்கள் மின்னஞ்சல் முகவரியைக் கசிய விட்டுள்ளது என்றும் அறிந்து கொள்ளலாம்.
  • அனுப்பும் பட்டனை தட்டி விட்டால் மின்னல் வேகத்தில், தடுத்தாலும் நில்லாமல் மின்னஞ்சல் பெறுநரைச் சென்றடையும். ஜிமெயிலில் உள்ள ஒரு வசதியின் படி, மின்னஞ்சலை அனுப்பிய பின்னரும், 30 நொடிகள் வரை அதைத் தடுத்து நிறுத்த நமக்கு அவகாசம் கொடுக்கப்படும்.
  • ஒரு பதிலை சேமித்து வைத்து, ஒரே மாதிரியான மின்னஞ்சல்களுக்கு அதே பதிலை தட்டச்சு செய்யாமல் அப்படியே அனுப்ப முடியும்.
  • அடிக்கடி தொடர்பு கொள்ளும் முகவரிகளை எல்லாம் சேர்த்து ஒரு குழுவாக சேமித்து வைத்துக் கொண்டால், அடுத்தடுத்து மின்னஞ்சல்கள் அனுப்பும் போது குழுவின் பெயரை மட்டும் குறிப்பிட்டால் போதும்; அனைவருக்கும் மின்னஞ்சல் சென்று விடும்.

– தொடரும்

ஓகே கூகுள் – 2 யூடியூப்

கண்ணு சிறுசு, காண்பதெல்லாம் பெரிசு.

சிறுவயதில் வெள்ளிக்கிழமை ‘ஒளியும் ஒலியும்’ நிகழ்ச்சியையும், ஞாயிற்றுக்கிழமை தமிழ்த் திரைப்படத்தையும் பார்க்க 8 வீடுகளிருந்த எங்கள் காம்பவுண்டில் அனைத்து வயதினரும் தொலைக்காட்சி இருக்கும் வீட்டின் முன் தவம் கிடப்போம். அதை விட்டால் திரையரங்குகளுக்குத் தான் திரைப்படங்கள் பார்க்க செல்ல வேண்டும். அதன் பின் கேபிள் டிவி சேனல்கள் தலை தூக்க ஆரம்பித்தன. அமிர்தம் டீக்கடையில் கூட்டம் அப்படி அலை மோதும், டீக்கடைத் தொலைக்காட்சியில் கிரிக்கெட் போட்டிகள் பார்ப்பதற்காகவே. அரசு தொலைக்காட்சிகளை வழங்கிய பிறகு டிவி சேனல்கள் கண்களைக் கட்டிப் போட்டு விட்டன. வீடியோ அப்படியே வீடியோ கேசட், சி.டி, டிவிடி, USB ட்ரைவ் என தவழ்ந்து, அமர்ந்து, நடந்து, ஓடி வந்து இப்போது யூடியூபில் நிற்கிறது. தொலைக்காட்சி சேனல்கள் எவ்வளவோ மாறுதல்களை அடைந்து, எண்ணிலடங்காமல் இருந்து வந்தாலும் காட்சி ஊடகம் என்னவோ தன் ஒரு கண்ணை தற்போது இணையத்திலும் வைத்திருக்கின்றது.

அறிமுகம்

YouTube-social-icon2யூடியூப் உலக அளவில் அதிகமாக உபயோகிக்கப்படும் இரண்டாவது இணையதளம். யூடியூப் வீடியோக்களைப் பகிர்ந்து கொள்வதற்கான தளம். ஆனால் பொழுதுபோக்கையும் தாண்டி, அரசியல், அறிவியல், சமையல் குறிப்புகள், தொழில் நுட்பம், விளையாட்டு, ஏன்? எப்படி? எதற்கு? என பலதரப்பட்டவிஷயங்களையும் அறிந்து கொள்ளும் களமாக அது இருந்து வருகிறது. ஒவ்வொரு நிமிடமும் 400 மணி நேரத்திற்கான வீடியோக்கள் பதிவேற்றப்படுகின்றன என்றால் பார்த்துக் கொள்ளுங்கள். வீடியோக்களுக்கான சமூக  வலைத்தளமாக விளங்கும் யூடியூப், படைப்பாளிகளையும், பார்வையாளர்களையும் ஒருங்கிணைக்கும் பாலம். குழந்தைகளுக்கென பிரத்யேகமாக அவர்களுக்கு ஏற்ற வீடியோக்களை மட்டுமே காட்ட யூடியூப் கிட்ஸ் என்றொரு செயலியுமுள்ளது.

யூடியூப் பேபி பிறந்த கதை

2005-ல் சாட் ஹர்லி, ஸ்டீவ் சென், ஜாவித் கரிம் ஆகிய மூவர் யூடியூபை நிறுவினார்கள். மூவரையும் ஒன்றிணைத்தது அதற்கு முன் அவர்கள் பணியாற்றிய பேபால் நிறுவனம். முதலில் அவர்களுக்குத் தோன்றிய யோசனை ஆன்லைன் வீடியோ டேட்டிங் தளம்;ஏனோ அது கைவிடப்பட்டது. இன்றைய யூடியூப் உருவாக முக்கிய நிகழ்வுகளாக இருந்தவற்றில் முக்கியமானது, சாட் மற்றும் ஸ்டீவ் கலந்து கொண்ட டின்னர் பார்ட்டியை கரிம் “செல்லாது! செல்லாது! நீங்கள் அப்படி எதுவும் பண்ணல” என்று மறுத்து விட்டதாம். நாமாக இருந்திருந்தால் “நம்புனா நம்பு! நம்பாட்டி நீ அங்கிட்டு போ! நான் இங்கிட்டு போறேன்” என்று நடையைக் கட்டியிருப்போம். இன்னொரு நிகழ்வாக குறிப்பிடப்படுவது 2004 சூப்பர் பௌல் விளையாட்டு இடைவேளையில் நடைபெற்ற நிகழ்ச்சியின் போது ஜானட் ஜாக்ஸனின் மேலாடை தவறிய காட்சியும், சுனாமி காட்சிகளும் கரிமுக்கு இணையத்தில் எங்கு தேடியும் கிடைக்காததாம். நவம்பர் 2006-ல் கூகுள் யூடியூபை 1.65 பில்லியன் அமெரிக்க டாலர்களுக்கு வாங்கியது. தற்போது யூடியூப் கூகுளின் கிளை நிறுவனமாக இருந்து வருகிறது. யூடியூபில் டிவி நிகழ்ச்சிகளையும், ஸ்மார்ட் டிவிகளில் யூடியூபையும் பார்க்க வைத்ததே யூடியூபின் வளர்ச்சிக்கு சான்று.

முதல் யூடியூப் வீடியோ

யூடியூப் சேனல்

யூடியூபில் கணக்கில்லாமல் வீடியோக்களைப் பார்க்கலாம். அதுவும் ஒரு வீடியோ பார்த்துக் கொண்டிருக்கும் போதே, பரிந்துரைக்கிறேன் பேர்வழி என்று அதையொத்த வீடியோக்களை பக்கவாட்டில் காட்டும். அப்படியே ஆட்டோ ப்ளேவில் அதை ஓடவிட்டு விட்டு ஜம்மென்று பார்த்து ரசிக்கலாம். யூடியூபுக்குள்  நுழைந்து விட்டாலே சராசரியாக குறைந்தது ~40 நிமிடங்களை ஒருவர் செலவிடுகிறாராம். இப்படியே பார்த்து பார்த்து நாட்களும் ஓடிக் கொண்டிருக்கும் போது, எப்போதாவது நாமும் கூட ஒரு வீடியோவை உருவாக்கி பதிவேற்றலாமே என்று பல்பு எரிந்தால் உங்களுக்கென்று ஒரு யூடியூப் சேனலை உருவாக்குங்கள். உங்களுக்கு என்ன தெரியுமோ அதை ஆடியன்ஸின் பல்ஸுக்கேற்ப வீடியோக்களாக பதிவேற்றும் போது, லைக்ஸ் அள்ளும்; வ்யூஸ் எண்ணிக்கை உயரும்; உங்கள் சேனலுக்கென்று ஒரு தனி ரசிகர் வட்டம் உருவாகும். சிறந்த படைப்புகளை உருவாக்கத் தேவையான குறிப்புகளை நீங்கள் யூடியூப் அகாடமியில் காணலாம். அதன் பின்னர் உங்களது சேனலில் உள்ள வீடியோக்களுக்கு பணமாக்குதலை இயங்கச் செய்து, யூடியூப் மூலம் நீங்கள் பணமும் சம்பாதிக்கலாம். சமீபத்தில் யூடியூப் ஸ்பாட்லைட்டில் இடம் பெற்ற ‘Country Foods‘ சேனலைப் பாருங்கள். லஷ்மணின் 106 வயது பாட்டியின் சமையல் வீடியோக்கள் வைரல் ஹிட். இருக்கின்ற வேலையை விட்டுவிட்டு ஸ்ரீநாத்தும், லஷ்மணும் ஆரம்பித்த இந்த சேனல், அதை விடவே அதிக வருமானத்தை அவர்களுக்கு ஈட்டிக் கொடுக்கிறது.

விளம்பரங்கள்

யூடியூபில் சராசரியாக தினமும் ஒரு பில்லியன் மணி நேர வீடியோக்கள் பார்க்கப்படுகின்றன. இவ்வளவு பெரிய சந்தைக்குள் விளம்பரங்களை வெளியிட கம்பெனிகள் வரிசை கட்டாமலா இருக்கும். யூடியூபில் நீங்கள் விளம்பரம் செய்யும் போது, அது முகப்புப் பக்கத்திலோ, வீடியோக்கள் ஆரம்பிக்கும் முன்னரோ, வீடியோக்களுக்கு இடையிலோ அது சொருகப்பட்டிருக்கும். விளம்பரங்களை வெளியிட்ட பின்னர், அதை எத்தனை பேர், எத்தனை முறை பார்த்திருக்கிறார்கள்?, 5 நொடிகளுக்குப் பின் விளம்பரத்தைத் தாண்டிச் செல்ல வாய்ப்பு இருந்தாலும் வீடியோ முடியும் வரை பார்த்திருக்கிறார்களா? கம்பெனியைப் பற்றி எத்தனை பேர் தேடியிருக்கிறார்கள்? அதில் எவ்வளவு பேர் விளம்பரத்தைப் பார்த்தவர்கள் என்று எக்கச்சக்க புள்ளி விவரங்களால் ஒரு மெகா சைஸ் கோலத்தையே நமக்கு போட்டுக் காட்டுகிறது. அதைப் புரிந்து கொண்டு அதற்கேற்ப கம்பெனி ஃபிராண்டுகளை மக்களுக்கு கொண்டு போய் சேர்ப்பது தான் பாக்கி. குறைந்தது 30 நொடிகள் அல்லது விளம்பரம் முடியும் வரை பார்த்திருந்தால் மட்டுமே அதற்காக பணம் வசூலிக்கப்படும் எனும் யூடியூபின் நேர்மை பிடித்திருக்கிறது (ஒருமுறை பார்க்கப்பட்டால் $.20). 2015-ல் யூடியூபுக்கு விளம்பரங்களால் மட்டும் கிடைத்த நிகர வருவாய் 4.28 பில்லியன் அமெரிக்க டாலர்கள். வாடிக்கையாளர்களைக் கவரும் வண்ணம் எப்படி விளம்பரப்படம் எடுப்பது என்று இங்கே வகுப்பெடுக்கிறது யூடியூப். உதாரணத்திற்கு விளம்பரப்படத்தில் அடுத்து பார்வையாளர்கள் என்ன செய்ய வேண்டும் எனத் தெளிவாக வழிநடத்தப்பட வேண்டும் (CTA). இந்தப் பதிவுகள் உங்களுக்குப் பிடித்திருந்தால், லைக் மற்றும் ஷேர் செய்யவும் 😉

 

நாம் யூடியூபில் வீடியோக்களைக் கண்டுகளித்துக் கொண்டிருப்பதாக மட்டும் நினைத்துக் கொண்டிருக்கிறோம்; ஆனால் நாம் பார்க்கும்/தேடும் வீடியோக்களின் வழியே யூடியூப் நம்மைக் கண்காணித்துக் கொண்டிருப்பதும் நினைவிலிருக்கட்டும்.

– தொடரும்

ஓகே கூகுள் – 1 வரைபடம்

மதுரைக்கு வழி வாயிலே.

முன்பெல்லாம் புதிதாக ஓர் இடத்திற்குச் செல்லும் போது, பேருந்து நிலையத்திலிருந்தோ, இரயில் நிலையத்திலிருந்தோ எப்படி அந்த இடத்தை அடைவது என்று வழியை முன்பே ஓரளவுக்கு தெரிந்து வைத்திருப்பர். இல்லையென்றால் பேருந்தை விட்டு இறங்கியவுடன் தென்படும் டீக்கடையில், ஒரு டீ வாங்கி குடித்துக் கொண்டே வழியை விசாரிப்பர்; ‘அவரும் நேரா போய் லெஃப்ட் எடுத்தீங்கனா கொஞ்ச தூரத்துல ஓர் ஆலமரம் வரும்; அப்படியே போனீங்கனா இரண்டு ரோடு பிரியும்; அதுல ரைட் சைடு நடந்து போங்க … ‘ என்று விலாவரியாக விலாசத்தை சொல்லுவார். நம்ம நேரா போய் லெஃப்ட் எடுத்துட்டு, அதற்கு பின் எப்படி போக வேண்டும் என்று மீண்டும் வழியை விசாரிப்போம். மரங்கள், கோவில்கள், சிலைகள் வழிகாட்டும் போது பிரபல அடையாள சின்னங்கள். அலைபேசி பரவலாக உபயோகத்தில் வந்த பின்பு, அலை வழியாகவே வந்து வீட்டிற்கு அழைத்துச் செல்பவர்கள் உளர். இருப்பினும் முன் பின் தெரியாதவர்கள் வீட்டிற்கோ, ஒரு புதிய இடத்திற்கோ செல்வதென்றால் சற்று சிரமம் தான். அதுவும் மெட்ரோ நகரங்களில் யாரிடமாவது வழி கேட்டால் பெரும்பாலானோர்களிடமிருந்து வரும் பதில் ‘நானும் அசலூர் தான்’.

Google-Mapsஇன்றைய தேதிக்கு ஸ்மார்ட் போன்களின் வரவு, அட்ரஸ் தேடி அலையும் நேரத்தை மிச்சப்படுத்தியிருக்கிறது. ஸ்மார்ட் போனில் வரைபட செயலியை நிறுவி விட்டால் போதும்; தற்போது எந்த இடத்தில் இருக்கிறோம், செல்ல வேண்டிய இடத்திற்கு இருக்கும் தூரம் எவ்வளவு, விரைந்து செல்ல எவ்வழியில் செல்லலாம், வழியில் போக்குவரத்து நெரிசல் நிலவரம் எப்படி, செல்லும் இடத்திற்கான அரசு போக்குவரத்து விவரங்கள் என எக்கச்சக்க விஷயங்கள்; ஒரு வழிகாட்டியாய் சேரும் இடம் வரை வழியை சொல்லிக் கொண்டே வரும்; கேட்டுக் கொண்டே  பத்திரமாய் போய் சேருவது தான் பாக்கி. வரைபடம், அதிகமாக உபயோகிக்கப்படும் ஸ்மார்ட்போன் செயலிகளில் ஒன்று. சில நாட்களாக தொலைக்காட்சி விளம்பரங்களில், சாலையோர விளம்பரப் பலகைகளில் #LookBeforeYouLeave ஹேஷ் டேக்குடன்  கூகுள் வரைபடத்தைக் காண முடிகிறது. அதில் ஒரு விளம்பரம்:-

Where 2 Technologies கம்பெனியை 2004-ல்  கூகுள் வாங்கியதிலிருந்து ஆரம்பிக்கிறது வரைபடத்தின் பயணம். C++ மொழியில் டெஸ்க்டாப் நிரலாக்கமாக இருந்தது இணைய மென் பொருளாக மாற்றி அமைக்கப்பட்டது. நிலப்பரப்பு தரவுகளைக் காட்சிப்படுத்தும் மென் பொருள்களை உருவாக்கும் Keyhole கம்பெனியையும், போக்குவரத்து நெரிசல் தகவல்களை சுடச் சுடக் கூறு போட்டு கொடுக்கும் ZipDash கம்பெனியையும் வாங்கிய பிறகு வரைபடத்திற்கான ஸ்கெட்ச் பெரிதாக போடப்பட்டது. 2005-ல் முதன் முதலாக வெளியிடப்பட்ட கூகுள் வரைபடத்தின் பரிணாம வளர்ச்சியை, நம் பாக்கெட்டில் இருக்கும் ஸ்மார்ட்போன் வரைபட செயலியே காட்டி கொடுத்து விடும். இதற்கு பின்னால் உள்ள தொழில் நுட்பமும், உழைப்பும் அசாத்தியமானவை. பல பங்குகளிடமிருந்து பெற்ற தரவுகளையெல்லாம் ஒன்றாக அரைத்து மெருகூட்டினால், இறுதியாகத் தான் நாம் காணும் கூகுள் வரைபடம் கிடைக்கும். ஒரே ஒரு மூலத்தை மட்டும் சார்ந்திராமல், கிடைக்கும் தரவுகளை எல்லாம் தேவையான இடங்களில் பயன்படுத்துகிறது கூகுள். அது மட்டுமில்லாமல், தெருத் தெருவாக புகைப்படக் கருவிகளுடன் காரை ஓட்டியும் தரவுகளைச் சேகரிக்கிறது. இதனால் காரால் செல்லக்கூடிய வழித்தடங்களை சரிபார்த்தது மாதிரியும் ஆயிற்று; இடங்களின், தடங்களின், போக்குவரத்துக் குறியீடுகளின் புகைப்படங்களை எடுத்தது மாதிரியும் ஆயிற்று. உதாரணத்திற்கு இந்த தரவுகளையும், புகைப்படங்களையும், அஞ்சப்பர் உணவகச் சின்னத்துடன் பொருத்திப் பார்த்து எங்கெல்லாம் அஞ்சப்பர் உணவகம் இருக்கின்றது என்று கண்டுபிடிக்க முடியும். வரலாறு மிகவும் முக்கியம்; கூகுள் வரைபடத்தின் சுருக்கமான வரலாற்றின் காணொளியைக் காண இங்கே சொடுக்கவும்.

தாஜ்மஹாலின் 360 டிகிரி ஸ்ட்ரீட் வ்யூ (Street View)

எத்துணை தரவுகளைத் தன்னகத்தே வரைபடம் கொண்டிருந்தாலும், இன்னொரு முக்கியமான தகவல் தான் அதை முழுமையடையச் செய்து, நமக்கு அதை பயனுள்ளதாக்கும்; அது தற்போது நீங்கள் எங்கே இருக்கின்றீர்கள் என்பது. அதை அறிந்து கொள்ள நமக்கு ஜி.பி.எஸ் அவசியமாகிறது. புவியிடங்காட்டி (Global Positioning System – GPS) என்பது உலகத்தில் ஓரிடத்தைத் துல்லியமாக வானில் இருந்து அறியும் ஒரு கருவியும் திட்ட அமைப்பும் ஆகும். ஒரு ஜி.பி.எஸ் பெறுதல்(GPS Receiver) அமைப்பு செயற்கைகோள்களிடமிருந்து செய்திகளைப் பெற்று, அதற்கும் செயற்கைக்கோள்களுக்குமான தூரத்தை அளவிடுகிறது. இவ்வாறாக குறைந்ததது மூன்று செயற்கைகோள்களின் தூரம் தெரியும் பட்சத்தில்  டிரைலேடர்ஷன் முறைப்படி ஓரிடத்தைத் (அட்சரேகை மற்றும் தீர்க்கரேகை) துல்லியமாக தீர்மானிக்க  முடியும். இடத்தின்  உயரத்தையும்(முப்பரிமாணம்)  சேர்த்து அறிய அவ்விடத்திலிருந்து நான்கு  செயற்கைகோள்களின் தூரம் தெரிந்திருக்க வேண்டும். உதாரணத்திற்கு, பெங்களூருவிலிருந்து ~500 கி.மீ எனும் போது அது திருவனந்தபுரமாகவோ, ஹைதராபாத்தாகவோ, பனாஜியாகவோ, மதுரையாகவோ இருக்கலாம்; சென்னையிலிருந்தும் அந்த ஊர்  ~500 கி.மீ என்று சேர்க்கும் போது, அது ஹைதராபாத் அல்லது மதுரையாக இருக்கலாம்; அதே ஊர் நாகர்கோயிலிலிருந்து ~200 கி. மீ என்று தகவல்கள் கூடும் போது, ஹைதராபாத் காணாமல் போய் அந்த ஊர் மதுரை என்பது தெள்ளத் தெளிவாகிறது. இதான்பா டிரைலேடர்ஷன்!

கூகுள் வரைபடத் தரவுகள் மேல் பல்வேறு நிறுவனங்கள் காப்புரிமை கொண்டுள்ளன. அவற்றை இலவசமாக உபயோகிக்க முடியாது. எனவே தான் விக்கிபீடியாவைப் போலவே திறத்தரவு வரைபடத் திட்டப் பணியான OpenStreetMap-ல் வரைபடத் தரவுகள், தன்னார்வலர்களால் திரட்டப்பட்டு வருகின்றன.

– தொடரும்

ஓகே கூகுள்

சில தினங்களுக்கு முன், அலுவலக நண்பர் வீட்டுக்கு இரவு விருந்துக்குச் சென்றிருந்தேன். நல விசாரிப்புகள், சிறிது நேர உரையாடலுக்குப் பின் உணவருந்தச் செல்லும் போது, ‘ஓகே கூகுள்! பிளே தமிழ் சாங்ஸ்’ என்று கட்டளையிட்டார். ஒரு திரைப்படப் பாடல் ஒலிக்க ஆரம்பித்தது.’ஓகே கூகுள்! சேஞ்ச் த ரூம் கலர்’ என்றார்; அறை நிறம் உஜாலாவிற்கு மாறிவிட்டது. பழைய திரைப்படங்களில் விளக்கைத் தேய்த்தவுடன் வெளிவந்து எஜமானர்களின் கட்டளைகளை புன்சிரிப்புடன் நிறைவேற்றும் பூதம் ஏதாவது தென்படுகிறதா என்று தேடிப் பார்த்தேன்; சிக்கவில்லை. இவையெல்லாம் விளக்கை விட அளவில் சற்றே பெரியதான கூகுள் ஹோமின் வேலை. Google_Home கொஞ்சம் விளக்கமாக சொல்ல வேண்டுமென் றால், ‘கூகுள் ஹோம்‘ – புத்திசாலியான ஒலிப்பெருக்கி (smart speaker) . கட்டளைகளுக்கேற்ப பாடல்களை ஒலிக்க விடுவது, ஒலி அளவைக் கூட்டவோ/குறைக்கவோ செய்வது அதன் தலையாய கடமை. கூடுதலாக இன்னபிற கூகுள் சேவைகளின் உதவியுடன் சில வேலைகளையும் செய்கிறது. உதாரணத்திற்கு, கேட்கும் கேள்விகளுக்கு பதிலுரைப்பது (நீங்களும் வெல்லலாம் ஒரு கோடியில் ஃபோன் அ ஃபிரண்ட் லைஃப் லைனுக்கு அழைக்க சரியான ஆள் :-)), அன்றாட அலுவல்களைப் பட்டியலிடுவது, பணிக்கு செல்லும் வழியில் போக்குவரத்து நெரிசல் நிலவரத்தை சொல்வது, etc. சில வருடங்களுக்கு முன் அறையில் தோழர்களுடன் வசித்த போது, திரைப்படமோ பாடலோ பார்க்கும் போது, இதே வேலையை செய்பவர்களை ஆப்பரேட்டர் என்றழைப்பார்கள்.  ‘ஆப்பரேட்டர், பாட்டை மாத்து; சத்தத்தைக் கூட்டு/குறை…’ என்று ஆளாளுக்கு ஒன்று சொல்வார்கள். விளக்கை அணைத்து விடு என்பதை, ‘அப்படியே எந்திருக்கும் போது லைட்ட ஆஃப் பண்ணிருடா’ என்பார்கள்; இன்று அதே வேலைகளையெல்லாம் செய்வதற்கென்று, பிரத்யேகமாக ஒரு சாதனம். தொழில்நுட்ப வளர்ச்சி, நம்மை அறியாமலே மாற்றங்களை நமக்குள் திணித்து வருகிறது. எப்படி இருந்த நான் இப்படி ஆகிட்டேன் என, நான் உபயோகிக்கும் சில சேவைகளையும், அவை தொடர்பான செய்தி/நிகழ்வு/நினைவுகளையும் மீட்டிப் பார்க்கலாம் என்று இருக்கிறேன். அடுத்த பதிவில் பார்ப்போம்…

– தொடரும்