போக்கிமான் கொல்! [குறுங்கதை]

pokemon_kill இந்த விளையாட்டை விளையாட ஆரம்பித்ததிலிருந்தே, அவனுக்கு பரபரப்பும் படபடப்பும் ஒரு சேர ஒட்டிக் கொண்டு விட்டன. சென்ற வாரம், முதல் போக்கிமானைப் பிடிக்கச் சென்ற இடத்தில் ஒருவர் கொடூரமான முறையில் கொல்லப்பட்டிருந்தார்; சம்பவம் நடந்த இடத்தில் போலீஸார் தீவிர விசாரணையில் ஈடுபட்டிருந்தனர். அது தற்செயலான சம்பவமாக இருக்கும் என அதைக் கடந்து, விளையாட்டைத் தொடர்ந்தான். ஆனால் அவன் சென்ற ஒவ்வொரு இடத்திலும்,  அதே முறையில், தொடர்ந்து கொலைகள் நடந்து, இரத்தக் கறைகள் பரவியிருந்தன … நாளிதழ்கள், டிவி சேனல்கள், சமூக வலை தளங்களென தொடர் கொலை பற்றிய செய்திகள்/வதந்திகள் வைரலாகிக் கொண்டிருந்தன. கொல்லப்பட்டவர்களுக்கிடையே எந்த ஒரு சம்பந்தமும் இல்லாததாலும், குற்றம் நடந்த இடங்களிலும் எந்த துப்பும் கிடைக்காததாலும் முடிந்த வரை முக்கிய இடங்களில் பாதுகாப்பைப் பலப்படுத்தியிருந்தது காவல் துறை. விளையாட்டிற்கும், தொடர் கொலைகளுக்கும் ஏதோ தொடர்பிருக்கின்றது என்று உள்ளுணர்வு அடித்துக் கொண்டாலும், போலீஸூக்கு செல்லவோ, விளையாடுவதை நிறுத்தவோ அவனுக்கு மனமில்லை. ஆட்டத்தைத் தொடர்ந்தான்… ஒரு வழியாக அடுத்த போக்கிஸ்டாப்பைக் கண்டுபிடித்து விட்டான். இந்த இடத்தில்  கொலை எதுவும் நடந்திருக்கவில்லை… அங்கிருக்கும் ஒவ்வொரு நிமிடமும் அவனது இதயத் துடிப்பு வெடித்து சிதறுமளவுக்கு எகிறிக் கொண்டிருந்தது. ஊரடங்கு உத்தரவு போடப்பட்டிருந்தது போல் வெறிச்சோடிக் கிடந்த அவ்விடத்தில், போக்கிமானையும் வேட்டையாடி விட்டு  கிளம்ப எத்தனித்த போது சற்று தொலைவில் யாரோ ஒரு முதியவர் யாருக்காவோ காத்திருப்பது போல தெரிந்தது. விரைவில் அவ்விடத்தை விட்டு நகரும் படி எச்சரித்து விட்டு செல்லலாம் என்று அவரை நெருங்கினான். சற்றும் எதிர்பாரா வண்ணம், அந்த முதியவர் பளபளக்கின்ற ஒரு கத்தியை எடுத்து சதக்கென்று இறக்கினார்… அவன் அனிச்சையாய் விலகியிருந்ததால், முதல் குத்து அவனுக்கு அதிக சேதத்தை விளைவித்திருக்கவில்லை. தொடர்ந்து தாக்குதலை எப்படி சமாளிக்கப் போகிறோம் என அவன் உறைந்து போயிருந்த நேரம், அடுத்தடுத்த எங்கிருந்தோ வந்த புல்லட்கள் அம்முதியவரை சாய்த்தன… மறைவிலிருந்த வெளிப்பட்ட காவல் துறை நண்பர் விளக்கினார், ‘இந்த சைக்கோ கொலைகாரனைப் புடிக்க எங்களுக்கு உருப்படியா ஒரு க்ளூவும் கிடைக்கல… கொல்லப்பட்டவங்க மொபைல்ல, அவங்க கடைசியா யூஸ் பண்ண ஆப்ஸ பார்த்தோம். அதில மேட்ச் ஆன ஆப்ஸ்ல ‘போக்கிமான் கோ’வும் ஒண்ணு. அதைத் தவிர இந்த கேஸ்ல வேறெந்த இம்ப்ரூவ்மெண்ட்ஸூம் இல்லாதப்ப தான், கொலை நடந்த இடங்களுக்கு அடுத்தடுத்த நீ வந்துட்ட போனத  நோட் பண்ணி, உன்ன ஷேடோயிங் பண்ணா ஏதாவது க்ளூ கிடைக்கும்னு நினைச்சோம். தட் வொர்க்டு. தாங்ஸ் ஃபார் யுவர்  ஹெல்ப்  டு ஃபண்ட் திஸ் சைக்கோ! பை த வே, க்ளூ தெரிஞ்சிருந்தும் எங்களுக்கு இன்பார்ம் பண்ணாம நீ விளையாடிட்டு இருந்தனால தான், அவன் உன்ன முதல் குத்து குத்துற வரைக்கும் வெயிட் பண்ணிட்டு, அவன சுட்டேன். இட்ஸ் நாட் எ கேம் …’

Advertisements

சிவா முத்தொகுதி

Shiva_Trilogyஅமீஷின் சிவா முத்தொகுதி, புராண கதாபாத்திரங்களுக்கு உயிர் கொடுத்து வரலாற்றில் உலவ விடும் புனைவிலக்கியம். திபெத்திய காட்டுவாசியாக மெலூஹாவுக்குள் நுழையும் சிவன், நீலகண்டராகி மெலூஹ மக்களான சூர்யவம்சிகளுக்கெதிராக செயல்படும் சந்திரவம்சிகளை, சூர்யவம்சி படையை வழிநடத்திச் சென்று துவம்சம் செய்வதோடு ‘மெலூஹாவின் அமரர்கள்‘ நிறைவடைகிறது. சந்திரவம்சிகளுக்கும் நாகர்களுக்கும் என்ன சம்பந்தம்? மந்தரமலைத் தகர்ப்பின் பின்ணணி என்ன? சதியைக் குறி வைக்கும் நாகன் யார்? இப்படி பல கேள்விகளுக்கு பதில் தேடி சிவன் நாகர்களின் தலைநகரான பஞ்சவடிக்கு மேற்கொள்ளும் பயணமே ‘நாகர்களின் இரகசியம்‘. ஒரு வழியாக தீமையைக் கண்டறிந்து, அதை அழிப்பதற்காக சிவன் புனிதப் போர் நடத்துவதே ‘வாயுபுத்ரர் வாக்கு‘. வரலாறு, புராணம், அறிவியல் என அமீஷ் கலந்து கட்டி அடித்திருப்பதால் விறுவிறுப்புக்கும், விஷயங்களுக்கும் பஞ்சமில்லை. முன்னரே பல முடிச்சுகள் அவிழ்க்கப்பட்டு விட்டதால், ‘வாயுபுத்ரர் வாக்கு’ சற்றே மெதுவாக நகர்கிறது. இருப்பினும், ‘சிவா முத்தொகுதி’ ஒரு நல்ல முயற்சி! எனக்கு இத்தொகுதியை வாசிக்கும் போது Anthropomorphism  (கடவுள், மிருகம், பொருள்களுக்கு மனித வடிவம் கொடுத்தல்) தான் நினைவுக்கு வந்தது. கீழே கொடுக்கப்பட்டுள்ள வரைபடம் வாசிப்பின் போது உதவியாக இருக்கும்:-

shiva_trilogy

வாசிப்பின் போது எடுத்த சில குறிப்புகள்:-

மெலூஹாவின் அமரர்கள்

இலையின் கோணத்திலிருந்து அதன் வர்ணத்தைப் பற்றி யோசி. அது எந்தெந்த நிறங்களை உள்வாங்கிக் கொள்கிறது; எவற்றைப் புறந்தள்ளுகிறது? அதன் நிறம் உண்மையில் பச்சைதானா? அல்லது – பச்சை தவிர்த்து உலகின் அத்தனை நிறங்களுமா?

இந்தப் பிரபஞ்சத்தை நாம் காணும் பலவித பார்வைகளில், வடிவங்களில், இரட்டைத்தன்மையும் ஒரு அங்கம். ஆண்மை, பெண்மை, போல. அசுரர்களும், சூர்யவம்சிகளும் ஆண்தன்மையைக் குறிப்பவர்கள். தேவர்களும், சந்திரவம்சிகளும், பெண்தன்மையின் பிரதிநிதிகள். பெயர்கள் மாறலாம் – ஆனால், அவை உருவகப்படுத்தும் சக்திகளென்னவோ, காலங்காலமாய், ஒன்றேதான். எப்போதும், என்றென்றும் நிலைத்திருக்கும். இரண்டில் எதையும் அழிக்க முடியாது. முயன்றால், இந்தப் பிரபஞ்சமே தூள் தூளாகச் சிதறிவிடும்.

பாரம் குறையவில்லை. ஆனால், அதைச் சுமக்கும் சக்தி வந்துவிட்டது.

நாகர்களின் இரகசியம்

உங்களால கற்பனை கூட செஞ்சு பாக்க முடியலைங்கிற ஒரே காரணத்துக்காக, அப்படியொரு விஷயமே இல்லைன்னு ஆகிடுமா?

உலகில் எதுவும் உண்மையல்ல; அனைத்தும் மாயை. இறுதியில், நமக்குத் தேவையானது எதுவுமே அல்ல என்பதை உணர்வதே அனைத்திற்கும் மேலான உண்மை. மாயையை உடைமையாக்கிக்கொள்வதும், எந்த உடைமையுமற்று இருப்பதும் ஒன்றே.

ஒரு விஷயம் தற்செயலா நடக்குதுன்னு பட்டுச்சுன்னா, அதுக்கான முழு காரிய காரணங்களை நாம் இன்னும் உணரலைன்னுதான் அர்த்தம்.

அன்புக்கு எதிர்ப்பதம் வெறுப்பு இல்ல. வெறுப்பு எப்ப வரும்? அந்த அன்பே ஆத்திரமா மாறும்போது. கெட்டுப்போகும்போது. அன்புக்கு உண்மையான எதிர் உணர்ச்சி, அலட்சியம். அடுத்தவங்களுக்கு என்ன ஆகுதுங்கற அக்கறையில்லாம போகுது பார். அதான்.

வாயுபுத்ரர் வாக்கு

ரொம்ப காலத்துக்கு முந்தி, பேர் தெரியாத ஒரு பிராமண விஞ்ஞானி, தவளைகளை வெச்சு சில பரிசோதனைகள் நடத்தினாராம். தவளையை எடுத்து கொதிக்கிற வென்னீர்ல போட்டாராம். தவளை உடனே வெளியே குதிச்சிடுச்சு. பிறகு, குளிர்ந்த நீர் இருக்கிற பானைக்குள்ளே போட்டார். தவளை நல்லா வசதியா உக்கார்ந்துக்கிச்சு. விஞ்ஞானி பல மணி நேரமா, தண்ணியோட சூட்டை அதிகரிச்சார் சூடு கொஞ்சம் கொஞ்சமா ஏறினாலும், தவளையை அது பாதிச்சதாத் தெரியலை. கடைசியா, தண்ணீர் தளதளன்னு கொதிக்கிற வரைக்கும் தவளை பானையைவிட்டு வெளிய வர முயற்சிக்கவேயில்ல, தப்பிக்காம, செத்துப்போச்சு.

எங்கே சென்று சேர்கிறோம் என்பதைவிட, நாம் செல்லும் பயணம்தான் நம் வாழ்க்கைக்குப் பொருள் கொடுக்கிறது.

காலம் கனிவதற்கு முன் உதயமாகும் உயர்ந்த எண்ணம், புரட்சியென்றுதான் புரளி பேசப்படும்.

தன்னைக் காப்பவர்களை தர்மம் காப்பாற்றும்.

 

 

புத்தகங்கள்

மறுபடியும் இந்த அமேசான் இந்தியத் திருவிழா தள்ளுபடியில்(தற்போது தீபாவளி தள்ளுபடி)  சில புத்தகங்களை அள்ளினேன். அவை முறையே:-

  • புயலிலே ஒரு தோணி – ப.சிங்காரம்
  • ஜே.ஜே: சில குறிப்புகள் – சுந்தர ராமசாமி
  • கொங்குதேர் வாழ்க்கை – நாஞ்சில் நாடன்
  • பிரபாகரன் வாழ்வும், மரணமும் – பா.ராகவன்

கிண்டில் மின்புத்தகங்கள் சில சிறந்த தள்ளுபடி விலையில் அமேசான் தளத்தில் தற்போது உள்ளன. ஒரு எட்டு போய் பார்க்கவும் 😉

மழலை மொழியாக்கம்

நான் சொல்லிக் கொடுக்கும் வார்த்தையை
மெல்ல மெல்ல மென்று, அதையே
எனக்கு சொல்லிக் கொடுக்கிறாள்,
மொழியாக்கம் செய்து,
மழலை மொழியில்.

மாதொருபாகன்

maathorubaaganதிருமணமான நாளிலிருந்தே தம்பதியர் அதிகமாக எதிர் கொள்ளும் கேள்வி ‘ஏதாச்சும் நல்ல சேதி இருக்கா?‘ (வார்த்தைகள் வேண்டுமானால் மாறலாம்). நாளாக நாளாக கேள்விகள், பேச்சுக்களாகவும், ஏச்சுக்களாகவும் மாறி அதுவே ஒரு பிரதான பிரச்சனையாகிவிடும். நாட்கள் வருடங்களானால் … பன்னிரெண்டு வருடங்களாக குழந்தைப் பேறின்றி தவிக்கும் ஒரு தம்பதியரின் அன்றாட வாழ்க்கையையும், அதன் பொருட்டு அவர்கள் சந்திக்கும் பிரச்சனைகளையும் பேசும் நாவலே, பெருமாள்முருகனின் ‘மாதொருபாகன்‘. 2010-ல் வெளிவந்த இந்நாவலை தடை செய்யக் கோரி பல்வேறு அமைப்புகள் 2015-ம் ஆண்டு வழக்கு தொடர்ந்தன. அதற்கு தடை விதிக்க மறுத்து 2016-ம் ஆண்டு தீர்ப்பளித்தது உயர்நீதிமன்றம். அதைத் தொடர்ந்து நாவலின் திருத்தப்பட்ட பதிப்பு 2016-ம் ஆண்டு வெளியாகிவுள்ளது. இவ்வளவு பிரச்சனைகளுக்கிடையிலும், சாகித்திய அகாடமியின் 2016-ம் ஆண்டுக்கான சிறந்த மொழியாக்கத்துக்கான விருதை ‘மாதொருபாகன்’ நாவலின் ஆங்கில பதிப்பான ‘ஒன் பார்ட் வுமன்'(அனிருத்தன் வாசுதேவன்) பெற்றுள்ளது குறிப்பிடத்தக்கது.

காளிக்கும், பொன்னாவுக்கும் திருமணமாகி பன்னிரெண்டு வருடங்களாகியும் குழந்தை இல்லை. அதற்காக அவர்கள் வேண்டாத சாமி இல்லை, செய்யாத பூஜை இல்லை; எதற்கும் பலன் கிட்டவில்லை. பொன்னா இடத்தில் வேறொருத்தியை நினைத்துப் பார்க்க முடியாத காளிக்கு, இரண்டாவது திருமணத்தில் ஏனோ விருப்பமில்லை. அவர்களுக்குள் நிறைவாக இருப்பினும், குழந்தை இல்லாததொரு குறையால் முழுமை பெறா வட்டமாய் தொங்கிக் கொண்டிருக்கும் அவர்களது வாழ்க்கைக்குத் தீர்வாய், பொன்னாவை பெருநோம்பிக்கு அனுப்பும் யோசனையை முன் வைக்கிறாள் காளியின் தாய். அந்த யோசனையில் காளிக்குத் துளியும் உடன்பாடில்லை; காளியின் முடிவே பொன்னாவினுடையது. காளியின் சம்மதத்துடன் நடப்பதாக நினைத்துக் கொண்டு, பெருநோம்பியின் போது யாரோ ஒருவருடன் கூடுவதற்கு வீட்டாரால் அழைத்துச் செல்லப்படுகிறாள் பொன்னா. இதையறிந்து காளி புலம்பவதுடன் நாவல் நிறைவடைகிறது. தொடர்ந்து ஒரே மாதிரியான சம்பவங்களை அடுக்கியிருப்பதால் சற்றே சலிப்பு தட்டினாலும், படைப்பாளியையே படை திரட்டிப் பழி வாங்கிய பாத்திரங்கள் நாவலோடு ஒட்ட வைக்கின்றன. நாவலின் புதிய திருத்தப் பதிப்பை சமீபத்தில் வாசித்தேன். நன்று!

 

வாசிப்பின் போது எடுத்த சில குறிப்புகள்:-

நீ எண்ணெயப் பூசிக்கிட்டுப் பொரண்டாலும் ஒட்டற மண்ணுத்தான் ஒட்டும் போ.

எத்தனை வருசக்கணக்காய் உடனிருந்தாலும் சில சந்தர்ப்பங்கள் அமையும்போதுதான் சில முகங்கள் தென்படுகின்றன. சந்தர்ப்பங்களே வாய்க்காமல் உள்ளே மூடிக் கிடக்கும் முகங்கள் எத்தனையோ. வெளிப்படாமலே அவை புதைந்துபோய் விடுகின்றன.

பாழாப்போன இந்தச் சனம் எவனுக்கு என்ன இருக்குதுன்னு பாக்காது. என்ன இல்லீன்னுதான் பாக்கும்.

தென்னைக்கு வருசம் முழுக்க நீர் வேண்டும். இல்லையெனில் மட்டைகள் காய்ந்து தொங்கி உச்சி சோர்ந்து போகும். இறக்கை கிழிந்த பறவை வானில் உறைந்து நின்றுவிட்ட கோலமாய்த் தென்னைகள் ஆகும்.

ஓகே கூகுள் – 6 தேடல்

தேடுங்கள், கண்டடைவீர்கள்!

சிறுவயதில் ஏதாவது ஒன்றைப் பற்றி தெரிந்து கொள்ள வேண்டுமெனில், அதைத் தேடி அலைய வேண்டும். விஷயம் தெரிந்தவர்களைத் தேடிப் பிடித்து, கேட்க வேண்டும். அறிமுகமேதும் இல்லாத பட்சத்தில் நூலகத்தில் பல புத்தகங்களைப் புரட்ட வேண்டும். தகவல் களஞ்சியத்தைக் கிளற வேண்டும். பத்திரிக்கைகளுக்கு கேள்விகளை அனுப்பி விட்டு ‘கேள்வி/பதில்’ பகுதியில் வரும் பதிலுக்காக காத்திருக்க வேண்டும்; பதில் வராமலும் போகலாம்; சில கேள்விகள் கேள்விகளாகவே மறைந்து விடலாம். ஆனால் இப்போதோ எதையும் தேடி அலையத் தேவையில்லை; யாரும், யாரிடமும் கேட்பதுமில்லை, கேட்க வேண்டிய அவசியமுமில்லை. யாவரும் நேராக போய் சரணடைவது, மேன்டிலிலிருந்து மேஜிக் வரை தெரிந்து வைத்திருக்கும் ஆல் இன் ஆல் அழகுராஜா’ கூகுளிடம் தான். கூகுள் இல்லையென்று கையை விரித்தால், அப்படி ஒன்று இல்லவே இல்லை என்னுமளவுக்கு நம்பிக்கையை சம்பாதித்து வைத்திருக்கிறது, கூகுள். ஒவ்வொரு தேடலுக்கும் பக்கம் பக்கமாய் கதை அளக்கும் கூகுளின் கதை என்ன?

அறிமுகம்

google_g_logoகூகுள் கூகுள் பண்ணி பார்த்தேன் உலகத்துல…‘ என திரைப்பட பாடல் வரிகளில் இடம் பெறுமளவுக்கு புகழ்பெற்ற தேடுபொறி, ‘கூகுள்’. கூகுளால் கண்டுபிடிக்க முடியாத ஒன்றை கண்டுபிடிப்பது அரிது என்று கூறுமளவுக்கு இணைய தேடலில் தனக்கென ஓர் இடத்தைத் தக்க வைத்துக் கொண்டிருக்கின்றது கூகுள் (அப்பேர்பட்ட  கூகுளையேத் திணறடித்த கேள்விகளுள் ஒன்று: ‘கட்டப்பா பாகுபலியை ஏன் கொன்றார்?’).ஆரம்ப காலகட்டங்களில் தேடும் வார்த்தைகள் அடங்கிய பக்கங்களை நீட்டுவதோடு நிறுத்திக் கொண்ட கூகுள், நாளடைவில் தேடல் சம்பந்தப்பட்ட படங்கள், வீடியோ என என்னென்ன இருக்கின்றனவோ அவை எல்லாவற்றையும் காட்டியது. படத் தேடல், குரல் வழித் தேடல், அலகு மாற்றம் (உதாரணத்திற்கு சென்டிமீட்டரிலிருந்து அடிக்கு), சில கேள்விகளுக்கு நேரடியான பதிலைக் கொடுப்பது (தமிழ்நாட்டின் தலைநகரம் என்று தட்ட, ‘சென்னை’ என்று பதில் வரும்), வானிலை முன்னறிவிப்பு, திரைப்படக் காட்சி நேரங்கள், விளையாட்டு முடிவுகள்/ஸ்கோர்போர்டுகள், மொழியாக்கம், தட்பவெப்ப நிலை, பிக் பாஸ் நிகழ்ச்சியில் போட்டியாளர்களைக் காப்பாற்ற ஓட்டளிக்கும் வசதி என பலதரப்பட்ட பணிகளுக்கும் ஒரே மருந்தாகிப் போன கூகுள் தேடலின் பரிணாம வளர்ச்சி பிரமிப்பூட்டுவதாகும்.

தளவரலாறு

கூகுளின் கதை 1995-ம் ஆண்டு, ஸ்டான்போர்டு பல்கலைக்கழகத்தில் ஆரம்பிக்கிறது. லாரி பேஜுக்கு  ஸ்டான்போர்டை செர்ஜி பிரின் சுற்றி காட்டும் போது அவர்கள் முதன் முதலாக சந்திக்கிறார்கள். முதலாம் சந்திப்பு எதிரும் புதிருமாக இருந்தாலும், அதற்கடுத்த வருடத்தில் இருவரும் கூட்டாளிகளாகின்றனர். இணையதளத்தில் சிதறிக் கிடந்த பக்கங்களின் முக்கியத்துவத்தை அதிலுள்ள இணைப்புகளால் கண்டறிந்து, அதை பயன்படுத்தி முடிவுகளைத் தரும் தேடுபொறியை அறையிலிருந்தவாறே உருவாக்கி, அத்தேடுபொறிக்கு பேக்ரப் எனப் பெயரிடுகின்றனர். நாளடைவில் கூகுள் என அப்பெயர் மாற்றம் அடைந்தது. உலகிலுள்ள தகவல்களையெல்லாம் ஒன்று திரட்டி, ஒழுங்குபடுத்தி யாவர்க்கும் கிடைக்கும்படி செய்வதும், பயனுள்ளதாக்குவதும் தான் கூகுளின் நோக்கம் மற்றும் பெயர்க்காரணம்.  1998-ம் ஆண்டு நிறுவனத்தின் பெயரை பதிவு செய்யும் போது ‘கூகால்’ (googol – ஒன்றுக்கு பின் நூறு பூஜ்யங்கள் கொண்ட எண்ணை இவ்வாறு அழைப்பர்) என்பதற்கு பதிலாக ‘கூகுள்'(google) என்று தவறுதலாக பதிவு செய்து விட்டனர். காலப்போக்கில் நிலைத்து விட்ட அந்த பெயர், பின்னர் ஆங்கில அகராதியிலும் இடம் பிடித்து, அவ்வார்த்தைக்கான அர்த்தத்தை தானாகவே உருவாக்கிக் கொண்டது. சில ஆண்டுகளிலேயே கல்வி வளாகத்தைத் தாண்டி, சிலிகான் பள்ளத்தாக்குக்குள் விழுந்து, முதலீட்டாளர்கள் முகத்தில்  தெறித்தது, கூகுள். ஆகஸ்டு 1998-ல் சன் இணை நிறுவனர் ஆன்டி பெச்டொல்ஹெய்ம் $100,000 காசோலை கொடுக்க, கூகுள் அதிகாரப்பூர்வமாக உதயமானது. கிடைத்த பணத்தைக் கொண்டு கூகுள் தன் முதல் அலுவலகத்துக்குள் காலடி எடுத்து வைத்தது; அது சூசன் (தற்போதைய யூடியூப் தலைமை நிர்வாக அதிகாரி) என்பவருக்கு சொந்தமான கார் நிறுத்தும் கராஜ். தனக்கென ஒரு தனி வழியை வகுத்துக் கொண்டு, கராஜிலிருந்து பயணித்து மாபெரும் சாம்ராஜ்ஜியத்தையே கட்டமைத்து, எளிதில் எட்ட முடியாத உயரத்தில் வீற்றிருக்கின்றது, கூகுள். இன்று (27-09-2017) தனது 19-வது பிறந்தநாளைக் கொண்டாடும் கூகுளுக்கு, டூடுளில் வந்த வாழ்த்துகள்:-

googles-19th-birthday-5117501686939648.5-l

அறிந்ததும், அறியாததும்!

  • உலக அளவில் அதிகமாக உபயோகிப்படும் இணையதளம்; அலெக்ஸா தர வரிசையில் முதலிடத்தை வகிக்கின்றது.
  • எந்த ஒரு தேடலுக்காகவும் 200-க்கும் மேற்பட்ட காரணிகளை அலசி ஆராய்ந்து, பின்னரே முடிவுகளைக் கொட்டினாலும், பதிலை பாக்கெட்டிலேயே வைத்து சுற்றிக் கொண்டிருப்பது போல் நொடிக்குள் முடிவுகளைத் தந்து அசத்தி விடுகிறது, கூகுள்.
  • கூகுளில் ஒவ்வொரு நிமிடமும், 2 மில்லியன்களுக்கும் அதிகமான தேடல்கள் நடக்கின்றன.
  • கூகுள் நிறுவனம் 1999-ம் ஆண்டு தன் தலைக்கு தானே, ஒரு மில்லியன் டாலர் என விலை நிர்ணயம் செய்தது; ஆனால் அப்போதைய எக்ஸைட் நிறுவனத்தின் தலைமை நிர்வாக அதிகாரி கைப்பிடிக்க வந்த அதிர்ஷ்ட தேவதையைத் தவற விட்டு விட்டார்.
  • ஆகஸ்டு 16, 2013 அன்று ஒரு ஐந்து நிமிடங்கள் கூகுள் கண்களை மூடிக் கொண்டது. அந்த ஐந்து நிமிடங்கள் இணையப் போக்குவரத்தே ஸ்தம்பித்துப் போய், வழக்கமான வரத்தில் 40% குறைவாகிப் போனது.
  • கூகுள் நிறுவனம் விளம்பரங்களிலிருந்து மட்டும் 20 பில்லியன் டாலர் வரை சம்பாதிக்கிறது.

 

திரைக்குப் பின்னால்

ஒரு தேடலுக்குப் பின்னால் என்ன நடக்கிறது? எப்படி மின்னல் வேகத்தில் முடிவுகள் நமக்குக் கிடைக்கின்றன? கூகுள் தேடல் தொழில்நுட்பத்தின் முதுகெலும்பு பேஜ்ரேங்க் வழிமுறை. இணையத்தில் சிதறிக் கிடக்கும் பக்கங்களில் உள்ள இணைப்புகளை வைத்து சிலந்திகளால் ஒரு வலையைப் பின்னி, பக்கங்களுக்கான தர வரிசைப்படி அவற்றை ஒழுங்குபடுத்தி வைக்கிறது. தேடப்படும் வாக்கியத்தில் உள்ள வார்த்தைகள் இடம் பெற்றிருக்கும் பக்கங்களை எடுத்து, பக்கத் தர வரிசைப்படி பக்காவான முடிவுகளை நொடிக்குள் நம் கண் முன் காட்டுகின்றது. அதிலும் 2013-லிருந்து கூகுள் உபயோகப்படுத்தி வரும் ஹம்மிங்பேர்டு வழிமுறையானது தேடப்படும் வார்த்தைகளை வைத்து என்ன தேட விழைகிறார்கள் என்பதைப் புரிந்து கொண்டு அதற்கேற்றாற் போல பொருள் சார்ந்த முடிவுகளைப் பட்டியலிடுகிறது.

வெறும் தேடுபொறியாக ஆரம்பித்த கூகுள், பல விதமான சேவைகளை வழங்கி காட்டுத் தீயாய் பரவிக் கொண்டிருக்கின்றது. என்ன தான் வாரி வாரிக் கொடுத்தாலும், கூகுள் நம்மை நிழலாய் பின்தொடர்கிறது. நமது தேடல் விவரங்கள் எல்லாம் அதற்கு மனப்பாடம்; அதனடிப்படையில் தான் நமக்கு விளம்பரங்களையேக் காட்டுகின்றது. எனவே உங்கள் தனிப்பட்ட தேடல் விவரங்கள் எல்லாம் கசியாமல், தவிர்க்க விரும்பினால் DuckDuckGo போன்ற தேடுபொறியை பயன்படுத்தவும்.

– தொடரும்

இன்று வாங்கிய புத்தகங்கள்

எங்கு நோக்கினும் அமேசான் மாபெரும் இந்தியத் திருவிழா தள்ளுபடி விளம்பரங்கள். தள்ளி நின்று வேடிக்கை தான் பார்த்துக் கொண்டிருந்தேன் என்றாலும், சில கிண்டில் மின்னூல்களுக்கு 75% தள்ளுபடி என்பதைப் பார்த்து விட்டு வாங்காமல் இருக்க முடியவில்லை. இன்று வாங்கிய புத்தகங்கள்:-

  1. ஒரு புளியமரத்தின் கதை – சுந்தர ராமசாமி
  2. அம்மா வந்தாள் – தி.ஜானகிராமன்
  3. மாதொருபாகன் – பெருமாள் முருகன்
  4. மொஸாட் – என்.சொக்கன்
  5. நல்ல தமிழில் எழுதுவோம் – என்.சொக்கன்

என்ன இருந்தாலும், மதுரைப் புத்தக கண்காட்சியை இந்த வருடம் தவற விட்டதில் சற்று மன வருத்தமே 😦