இன்று வாங்கிய புத்தகங்கள்

இன்று அமேசான் தள்ளுபடியில் கிண்டில் ஸ்டோரில் அள்ளிய புத்தகங்கள்:-

  1. மதில்கள் – வைக்கம் முகம்மது பஷீர்
  2. இந்து ஞான மரபில் ஆறு தரிசனங்கள் – ஜெயமோகன்
  3. விஷ்ணுபுரம் – ஜெயமோகன்
  4. அள்ள அள்ளப் பணம் 1 -பங்குச்சந்தை: அடிப்படைகள் – சோம. வள்ளியப்பன்
  5. யூதர்கள் ~ வரலாறும் வாழ்க்கையும் – முகில்
Advertisements

கருத்த லெப்பை

karuththa-leppai-10000034-800x800ஜபருல்லாஹ் தனது அக்கா ருக்கையாவுக்கு அமைந்து விட்ட அவல வாழ்க்கையால் எதன் மீதும் நம்பிக்கையற்று, வேலை வெட்டியின்றி ஊர் சுற்றிக் கொண்டிருக்கும், கருத்த லெப்பை. கருத்த லெப்பையைச் சுற்றி நகரும் கதையில் லெப்பை-ராவுத்தர் சமூக ஏற்றத் தாழ்வுகள் கதை நெடுகிலும்  பேசப்படுகின்றன. ராதிம்மா கனவில் தரிசித்த நாயகத்துக்கு உருவம் கொடுத்து களிமண் சிலையாகப் பார்க்கும் போது, எங்கிருந்தோ வீசப்படும் கற்கள் கருத்த லெப்பையைச் சாய்க்க, மழை சிலையைக் கரைக்கிறது. சொற்ப பக்கங்களே வரும் கதாபாத்திரங்கள் கூட நாவலின் செறிவுக்கு உதவும் வகையில் அமைந்திருக்கின்றன. எடுத்தால் வாசித்து முடித்து விட்டே வைக்கக் கூடிய அளவான குறுகிய நாவல். நன்று!

வாசிப்பின் போது ஈர்த்த வரிகள்

எல்லாரும் தாய் பிள்ளைங்களா இருக்கறப்போ காசு வந்து கலகம் பண்ணுது.

2017

இதே தலைப்பில் இந்த வருட ஆரம்பத்தில், ஒரு படமாக என் இவ்வருடத்தைய இலக்குகளைக் குறித்து பதிவேற்றியிருந்தேன். இப்போது அவற்றை மையமாக வைத்து 2017-ஐத் திரும்பிப் பார்ப்போம்.

  • வாசிப்பு – குட்ரீட்ஸின் 2017 வாசிப்பு சவாலில் ’20 புத்தகங்கள் வாசிக்க வேண்டும்’ என்றொரு இலக்கை நிர்ணயித்து, இன்று ஒரு வழியாக அதை எட்டியும் பிடித்தேன். நிறைவு! மகிழ்ச்சி!  வெண்முரசில் ஒரு நாவலையாவது தினமும் சுடச்சுட வாசிக்க வேண்டும் என்ற ஆசை ‘மாமலர்’ மூலம் நிறைவேறியது. இவ்வருடத்தில் வாசித்ததில் பிடித்தமான நாவல்களில் மாமலரும் ஒன்று. ஜே.ஜே: சில குறிப்புகள், அம்மா வந்தாள், சிவா முத்தொகுதி, மாதொருபாகன், பாகிஸ்தான் போகும் இரயில் ஆகியவை இவ்வருட வாசிப்பில் முக்கியமானவை.

Goodreads_2017_Challenge

  • ஓட்டம் – சொற்ப கி.மீ-களே இவ்வருடத்தில் கடந்திருக்கின்றேன். இதுவரை நான் ஓடிய 10 கி.மீ பந்தயங்களிலேயே சிறப்பான ஓட்டத்தை டி.சி.எஸ் 10 கி.மீ பந்தயத்தில் வெளிப்படுத்தியது மட்டுமே ஒரே ஆறுதல். அடியீடுமானி ஒன்றைக் கையில் கட்டுக் கொண்டு சுற்றிக் கொண்டிருக்கிறேன். இதனால் தொட்டதற்கெல்லாம் ரன்கீப்பரை உபயோகிக்கும் பழக்கம் குறைந்து விட்டது. இது கூட இவ்வருடத்தைய மோசமான ஓட்டத்துக்கு ஒரு காரணமாக இருக்குமோ? தடைபட்டு, உடைபட்டு நிற்கும் ஓட்டம், அடுத்த வருடமாவது சீராக தொடர வேண்டும்.
  • எழுத்து – பத்து வருடங்களுக்கும் மேலாக வலைப்பதிவுகள் எழுதி வரும் நிலையில், இவ்வருடமே அதிக பதிவுகளை எழுதியிருக்கின்றேன் என்பதில் மிக்க மகிழ்ச்சி! வலைப்பதிவில் இதுவரை எழுதிய கவிதைகளை மின்னூலாக வெளியிட்டிருக்கின்றேன் 🙂 குறுங்கதைகள், ஓகே கூகுள் கட்டுரைத் தொடர் என அக்டோபர் வரை சிறப்பாகவே நகர்ந்து கொண்டிருந்தது. அடுத்த வருடமும் இது தொடர வேண்டும் என்பது அவா.
  • திரைப்படங்கள் – வாரத்திற்கு ஒன்று வீதம் 50+ திரைப்படங்களைப் பார்த்திருக்கின்றேன். அவற்றுள் பிடித்தமானவை கீழே:-2017_Movies_Liked
  • இன்ன பிற மறக்க முடியாத தருணங்கள்:- தம்பியின் திருமணம், அனலிகாவின் முதல் பிறந்தநாள் விழா, சவன்துர்கா, பாண்டிச்சேரி பயணங்கள்.
  • வேலைப் பளுவால் நவம்பரும், டிசம்பரும் நான் குளிர் கால உறக்கத்தில் இருப்பது போல் பணியைத் தவிர வேறெந்த செயலுமின்றி சர்ரென்று கடந்து விட்டன. ஆனது ஆகட்டும், 2018-ஐ வரவேற்கத் தயாராவோம். வருக 2018!

பெங்களூரு இலக்கியத் திருவிழா 2017

பெங்களூரு இலக்கியத் திருவிழா 2017 இரண்டு நாட்கள் (28-10 & 29-10) நடைபெற்றது. சனிக்கிழமை நான் அரங்கிற்குள் நுழையும் போது, ராமச்சந்திர குஹா நாட்டுப்பற்று vs வெறி குறித்துப் பேசிக் கொண்டிருந்தார். அது முடிந்தவுடன் ஆட்டா கலாட்டாவின் புத்தக ஸ்டாலுக்கு சென்று  பெருமாள் முருகனின் மாதொருபாகன், கூளமாதாரி, சாதியும் நானும் மற்றும் அம்பையின் சிறகுகள் முறியும் ஆகிய புத்தங்களை வாங்கிக் கொண்டேன். அடுத்ததாக ‘சாதியும் நானும்’ என்ற தலைப்பில் பெருமாள் முருகன், அம்பை, கண்ணன் சுந்தரம் ஆகியோர் உரையாடிக் கொண்டிருந்ததைக் கேட்டேன். ‘சாதியும் நானும்’ புத்தகங்களில் உள்ள அனுபவக் கட்டுரைகளைத் தான் தொகுத்த விதத்தையும், அம்பை அதைத் தானாக முன் வந்து ஆங்கிலத்தில் மொழியாக்கியதையும் பெருமாள் முருகன் விவரித்தார்; பெருமாள் முருகன் பேசியதை கண்ணன் ஆங்கிலத்தில் மொழிபெயர்த்தார்.  ‘சாதியும் நானும்’ ஆங்கிலத்தில் ‘Black Coffee in a Cocunut Shell’-ஆக வெளியாகியுள்ளதையடுத்து இந்த அமர்வாம். ‘ஆகாய கங்கை’ எனும் தலைப்பில் இந்திரா லங்கேஷ், மரு.விஜயா, ஆஷா தேவி ஆகியோர் லங்கேஷ் மற்றும் கௌரி லங்கேஷ் பற்றி பேசிக் கொண்டிருந்தனர். முழுக்க முழுக்க கன்னடத்தில் இருந்தது அவர்களின் பேச்சு; அரைகுறையாகத் தான் புரிந்தது. 1984-ம் ஆண்டு சீக்கியர்கள் படுகொலையின் போது தங்களது அனுபவங்களை ஹர்தீப் சிங், கன்வால்ஜீத் தியோல், என்.எஸ்.மாதவன், ப்ரீத்தி கில் ஆகியோர் பகிர்ந்து கொண்டனர். அடுத்ததாக இளம் எழுத்தாளர்கள் சவி சர்மாவும், வருண் அகர்வாலும் புது எழுத்தாளர்களை ஊக்குவிக்கும் வகையில் தங்களுடைய கதையைச் சொன்னார்கள். அனில் கும்ப்ளே, ராஜ்தீப் சர்தேசாய், கிடியான் ஹை, ஷர்தா உக்ரா ஆகியோர் டி20 உலகப் போப்பையை இந்தியா வென்றது என்னென்ன மாற்றங்களை இந்திய மற்றும் உலக கிரிக்கெட்டிற்குள் கொண்டு வந்தது என விவாதித்தனர்; இவ்விவாதத்தின் போது கூட்டம் பிய்த்துக் கொண்டு நின்றது. அத்தோடு நான் கிளம்பி வந்து விட்டேன். ஞாயிற்றுக்கிழமை திருவிழாவிற்கு செல்லவில்லை; விடுப்பு எடுத்துக் கொண்டேன் 😉blrlitfest

சிவா முத்தொகுதி

Shiva_Trilogyஅமீஷின் சிவா முத்தொகுதி, புராண கதாபாத்திரங்களுக்கு உயிர் கொடுத்து வரலாற்றில் உலவ விடும் புனைவிலக்கியம். திபெத்திய காட்டுவாசியாக மெலூஹாவுக்குள் நுழையும் சிவன், நீலகண்டராகி மெலூஹ மக்களான சூர்யவம்சிகளுக்கெதிராக செயல்படும் சந்திரவம்சிகளை, சூர்யவம்சி படையை வழிநடத்திச் சென்று துவம்சம் செய்வதோடு ‘மெலூஹாவின் அமரர்கள்‘ நிறைவடைகிறது. சந்திரவம்சிகளுக்கும் நாகர்களுக்கும் என்ன சம்பந்தம்? மந்தரமலைத் தகர்ப்பின் பின்ணணி என்ன? சதியைக் குறி வைக்கும் நாகன் யார்? இப்படி பல கேள்விகளுக்கு பதில் தேடி சிவன் நாகர்களின் தலைநகரான பஞ்சவடிக்கு மேற்கொள்ளும் பயணமே ‘நாகர்களின் இரகசியம்‘. ஒரு வழியாக தீமையைக் கண்டறிந்து, அதை அழிப்பதற்காக சிவன் புனிதப் போர் நடத்துவதே ‘வாயுபுத்ரர் வாக்கு‘. வரலாறு, புராணம், அறிவியல் என அமீஷ் கலந்து கட்டி அடித்திருப்பதால் விறுவிறுப்புக்கும், விஷயங்களுக்கும் பஞ்சமில்லை. முன்னரே பல முடிச்சுகள் அவிழ்க்கப்பட்டு விட்டதால், ‘வாயுபுத்ரர் வாக்கு’ சற்றே மெதுவாக நகர்கிறது. இருப்பினும், ‘சிவா முத்தொகுதி’ ஒரு நல்ல முயற்சி! எனக்கு இத்தொகுதியை வாசிக்கும் போது Anthropomorphism  (கடவுள், மிருகம், பொருள்களுக்கு மனித வடிவம் கொடுத்தல்) தான் நினைவுக்கு வந்தது. கீழே கொடுக்கப்பட்டுள்ள வரைபடம் வாசிப்பின் போது உதவியாக இருக்கும்:-

shiva_trilogy

வாசிப்பின் போது எடுத்த சில குறிப்புகள்:-

மெலூஹாவின் அமரர்கள்

இலையின் கோணத்திலிருந்து அதன் வர்ணத்தைப் பற்றி யோசி. அது எந்தெந்த நிறங்களை உள்வாங்கிக் கொள்கிறது; எவற்றைப் புறந்தள்ளுகிறது? அதன் நிறம் உண்மையில் பச்சைதானா? அல்லது – பச்சை தவிர்த்து உலகின் அத்தனை நிறங்களுமா?

இந்தப் பிரபஞ்சத்தை நாம் காணும் பலவித பார்வைகளில், வடிவங்களில், இரட்டைத்தன்மையும் ஒரு அங்கம். ஆண்மை, பெண்மை, போல. அசுரர்களும், சூர்யவம்சிகளும் ஆண்தன்மையைக் குறிப்பவர்கள். தேவர்களும், சந்திரவம்சிகளும், பெண்தன்மையின் பிரதிநிதிகள். பெயர்கள் மாறலாம் – ஆனால், அவை உருவகப்படுத்தும் சக்திகளென்னவோ, காலங்காலமாய், ஒன்றேதான். எப்போதும், என்றென்றும் நிலைத்திருக்கும். இரண்டில் எதையும் அழிக்க முடியாது. முயன்றால், இந்தப் பிரபஞ்சமே தூள் தூளாகச் சிதறிவிடும்.

பாரம் குறையவில்லை. ஆனால், அதைச் சுமக்கும் சக்தி வந்துவிட்டது.

நாகர்களின் இரகசியம்

உங்களால கற்பனை கூட செஞ்சு பாக்க முடியலைங்கிற ஒரே காரணத்துக்காக, அப்படியொரு விஷயமே இல்லைன்னு ஆகிடுமா?

உலகில் எதுவும் உண்மையல்ல; அனைத்தும் மாயை. இறுதியில், நமக்குத் தேவையானது எதுவுமே அல்ல என்பதை உணர்வதே அனைத்திற்கும் மேலான உண்மை. மாயையை உடைமையாக்கிக்கொள்வதும், எந்த உடைமையுமற்று இருப்பதும் ஒன்றே.

ஒரு விஷயம் தற்செயலா நடக்குதுன்னு பட்டுச்சுன்னா, அதுக்கான முழு காரிய காரணங்களை நாம் இன்னும் உணரலைன்னுதான் அர்த்தம்.

அன்புக்கு எதிர்ப்பதம் வெறுப்பு இல்ல. வெறுப்பு எப்ப வரும்? அந்த அன்பே ஆத்திரமா மாறும்போது. கெட்டுப்போகும்போது. அன்புக்கு உண்மையான எதிர் உணர்ச்சி, அலட்சியம். அடுத்தவங்களுக்கு என்ன ஆகுதுங்கற அக்கறையில்லாம போகுது பார். அதான்.

வாயுபுத்ரர் வாக்கு

ரொம்ப காலத்துக்கு முந்தி, பேர் தெரியாத ஒரு பிராமண விஞ்ஞானி, தவளைகளை வெச்சு சில பரிசோதனைகள் நடத்தினாராம். தவளையை எடுத்து கொதிக்கிற வென்னீர்ல போட்டாராம். தவளை உடனே வெளியே குதிச்சிடுச்சு. பிறகு, குளிர்ந்த நீர் இருக்கிற பானைக்குள்ளே போட்டார். தவளை நல்லா வசதியா உக்கார்ந்துக்கிச்சு. விஞ்ஞானி பல மணி நேரமா, தண்ணியோட சூட்டை அதிகரிச்சார் சூடு கொஞ்சம் கொஞ்சமா ஏறினாலும், தவளையை அது பாதிச்சதாத் தெரியலை. கடைசியா, தண்ணீர் தளதளன்னு கொதிக்கிற வரைக்கும் தவளை பானையைவிட்டு வெளிய வர முயற்சிக்கவேயில்ல, தப்பிக்காம, செத்துப்போச்சு.

எங்கே சென்று சேர்கிறோம் என்பதைவிட, நாம் செல்லும் பயணம்தான் நம் வாழ்க்கைக்குப் பொருள் கொடுக்கிறது.

காலம் கனிவதற்கு முன் உதயமாகும் உயர்ந்த எண்ணம், புரட்சியென்றுதான் புரளி பேசப்படும்.

தன்னைக் காப்பவர்களை தர்மம் காப்பாற்றும்.

 

 

புத்தகங்கள்

மறுபடியும் இந்த அமேசான் இந்தியத் திருவிழா தள்ளுபடியில்(தற்போது தீபாவளி தள்ளுபடி)  சில புத்தகங்களை அள்ளினேன். அவை முறையே:-

  • புயலிலே ஒரு தோணி – ப.சிங்காரம்
  • ஜே.ஜே: சில குறிப்புகள் – சுந்தர ராமசாமி
  • கொங்குதேர் வாழ்க்கை – நாஞ்சில் நாடன்
  • பிரபாகரன் வாழ்வும், மரணமும் – பா.ராகவன்

கிண்டில் மின்புத்தகங்கள் சில சிறந்த தள்ளுபடி விலையில் அமேசான் தளத்தில் தற்போது உள்ளன. ஒரு எட்டு போய் பார்க்கவும் 😉

ஓகே கூகுள் – 6 தேடல்

தேடுங்கள், கண்டடைவீர்கள்!

சிறுவயதில் ஏதாவது ஒன்றைப் பற்றி தெரிந்து கொள்ள வேண்டுமெனில், அதைத் தேடி அலைய வேண்டும். விஷயம் தெரிந்தவர்களைத் தேடிப் பிடித்து, கேட்க வேண்டும். அறிமுகமேதும் இல்லாத பட்சத்தில் நூலகத்தில் பல புத்தகங்களைப் புரட்ட வேண்டும். தகவல் களஞ்சியத்தைக் கிளற வேண்டும். பத்திரிக்கைகளுக்கு கேள்விகளை அனுப்பி விட்டு ‘கேள்வி/பதில்’ பகுதியில் வரும் பதிலுக்காக காத்திருக்க வேண்டும்; பதில் வராமலும் போகலாம்; சில கேள்விகள் கேள்விகளாகவே மறைந்து விடலாம். ஆனால் இப்போதோ எதையும் தேடி அலையத் தேவையில்லை; யாரும், யாரிடமும் கேட்பதுமில்லை, கேட்க வேண்டிய அவசியமுமில்லை. யாவரும் நேராக போய் சரணடைவது, மேன்டிலிலிருந்து மேஜிக் வரை தெரிந்து வைத்திருக்கும் ஆல் இன் ஆல் அழகுராஜா’ கூகுளிடம் தான். கூகுள் இல்லையென்று கையை விரித்தால், அப்படி ஒன்று இல்லவே இல்லை என்னுமளவுக்கு நம்பிக்கையை சம்பாதித்து வைத்திருக்கிறது, கூகுள். ஒவ்வொரு தேடலுக்கும் பக்கம் பக்கமாய் கதை அளக்கும் கூகுளின் கதை என்ன?

அறிமுகம்

google_g_logoகூகுள் கூகுள் பண்ணி பார்த்தேன் உலகத்துல…‘ என திரைப்பட பாடல் வரிகளில் இடம் பெறுமளவுக்கு புகழ்பெற்ற தேடுபொறி, ‘கூகுள்’. கூகுளால் கண்டுபிடிக்க முடியாத ஒன்றை கண்டுபிடிப்பது அரிது என்று கூறுமளவுக்கு இணைய தேடலில் தனக்கென ஓர் இடத்தைத் தக்க வைத்துக் கொண்டிருக்கின்றது கூகுள் (அப்பேர்பட்ட  கூகுளையேத் திணறடித்த கேள்விகளுள் ஒன்று: ‘கட்டப்பா பாகுபலியை ஏன் கொன்றார்?’).ஆரம்ப காலகட்டங்களில் தேடும் வார்த்தைகள் அடங்கிய பக்கங்களை நீட்டுவதோடு நிறுத்திக் கொண்ட கூகுள், நாளடைவில் தேடல் சம்பந்தப்பட்ட படங்கள், வீடியோ என என்னென்ன இருக்கின்றனவோ அவை எல்லாவற்றையும் காட்டியது. படத் தேடல், குரல் வழித் தேடல், அலகு மாற்றம் (உதாரணத்திற்கு சென்டிமீட்டரிலிருந்து அடிக்கு), சில கேள்விகளுக்கு நேரடியான பதிலைக் கொடுப்பது (தமிழ்நாட்டின் தலைநகரம் என்று தட்ட, ‘சென்னை’ என்று பதில் வரும்), வானிலை முன்னறிவிப்பு, திரைப்படக் காட்சி நேரங்கள், விளையாட்டு முடிவுகள்/ஸ்கோர்போர்டுகள், மொழியாக்கம், தட்பவெப்ப நிலை, பிக் பாஸ் நிகழ்ச்சியில் போட்டியாளர்களைக் காப்பாற்ற ஓட்டளிக்கும் வசதி என பலதரப்பட்ட பணிகளுக்கும் ஒரே மருந்தாகிப் போன கூகுள் தேடலின் பரிணாம வளர்ச்சி பிரமிப்பூட்டுவதாகும்.

தளவரலாறு

கூகுளின் கதை 1995-ம் ஆண்டு, ஸ்டான்போர்டு பல்கலைக்கழகத்தில் ஆரம்பிக்கிறது. லாரி பேஜுக்கு  ஸ்டான்போர்டை செர்ஜி பிரின் சுற்றி காட்டும் போது அவர்கள் முதன் முதலாக சந்திக்கிறார்கள். முதலாம் சந்திப்பு எதிரும் புதிருமாக இருந்தாலும், அதற்கடுத்த வருடத்தில் இருவரும் கூட்டாளிகளாகின்றனர். இணையதளத்தில் சிதறிக் கிடந்த பக்கங்களின் முக்கியத்துவத்தை அதிலுள்ள இணைப்புகளால் கண்டறிந்து, அதை பயன்படுத்தி முடிவுகளைத் தரும் தேடுபொறியை அறையிலிருந்தவாறே உருவாக்கி, அத்தேடுபொறிக்கு பேக்ரப் எனப் பெயரிடுகின்றனர். நாளடைவில் கூகுள் என அப்பெயர் மாற்றம் அடைந்தது. உலகிலுள்ள தகவல்களையெல்லாம் ஒன்று திரட்டி, ஒழுங்குபடுத்தி யாவர்க்கும் கிடைக்கும்படி செய்வதும், பயனுள்ளதாக்குவதும் தான் கூகுளின் நோக்கம் மற்றும் பெயர்க்காரணம்.  1998-ம் ஆண்டு நிறுவனத்தின் பெயரை பதிவு செய்யும் போது ‘கூகால்’ (googol – ஒன்றுக்கு பின் நூறு பூஜ்யங்கள் கொண்ட எண்ணை இவ்வாறு அழைப்பர்) என்பதற்கு பதிலாக ‘கூகுள்'(google) என்று தவறுதலாக பதிவு செய்து விட்டனர். காலப்போக்கில் நிலைத்து விட்ட அந்த பெயர், பின்னர் ஆங்கில அகராதியிலும் இடம் பிடித்து, அவ்வார்த்தைக்கான அர்த்தத்தை தானாகவே உருவாக்கிக் கொண்டது. சில ஆண்டுகளிலேயே கல்வி வளாகத்தைத் தாண்டி, சிலிகான் பள்ளத்தாக்குக்குள் விழுந்து, முதலீட்டாளர்கள் முகத்தில்  தெறித்தது, கூகுள். ஆகஸ்டு 1998-ல் சன் இணை நிறுவனர் ஆன்டி பெச்டொல்ஹெய்ம் $100,000 காசோலை கொடுக்க, கூகுள் அதிகாரப்பூர்வமாக உதயமானது. கிடைத்த பணத்தைக் கொண்டு கூகுள் தன் முதல் அலுவலகத்துக்குள் காலடி எடுத்து வைத்தது; அது சூசன் (தற்போதைய யூடியூப் தலைமை நிர்வாக அதிகாரி) என்பவருக்கு சொந்தமான கார் நிறுத்தும் கராஜ். தனக்கென ஒரு தனி வழியை வகுத்துக் கொண்டு, கராஜிலிருந்து பயணித்து மாபெரும் சாம்ராஜ்ஜியத்தையே கட்டமைத்து, எளிதில் எட்ட முடியாத உயரத்தில் வீற்றிருக்கின்றது, கூகுள். இன்று (27-09-2017) தனது 19-வது பிறந்தநாளைக் கொண்டாடும் கூகுளுக்கு, டூடுளில் வந்த வாழ்த்துகள்:-

googles-19th-birthday-5117501686939648.5-l

அறிந்ததும், அறியாததும்!

  • உலக அளவில் அதிகமாக உபயோகிப்படும் இணையதளம்; அலெக்ஸா தர வரிசையில் முதலிடத்தை வகிக்கின்றது.
  • எந்த ஒரு தேடலுக்காகவும் 200-க்கும் மேற்பட்ட காரணிகளை அலசி ஆராய்ந்து, பின்னரே முடிவுகளைக் கொட்டினாலும், பதிலை பாக்கெட்டிலேயே வைத்து சுற்றிக் கொண்டிருப்பது போல் நொடிக்குள் முடிவுகளைத் தந்து அசத்தி விடுகிறது, கூகுள்.
  • கூகுளில் ஒவ்வொரு நிமிடமும், 2 மில்லியன்களுக்கும் அதிகமான தேடல்கள் நடக்கின்றன.
  • கூகுள் நிறுவனம் 1999-ம் ஆண்டு தன் தலைக்கு தானே, ஒரு மில்லியன் டாலர் என விலை நிர்ணயம் செய்தது; ஆனால் அப்போதைய எக்ஸைட் நிறுவனத்தின் தலைமை நிர்வாக அதிகாரி கைப்பிடிக்க வந்த அதிர்ஷ்ட தேவதையைத் தவற விட்டு விட்டார்.
  • ஆகஸ்டு 16, 2013 அன்று ஒரு ஐந்து நிமிடங்கள் கூகுள் கண்களை மூடிக் கொண்டது. அந்த ஐந்து நிமிடங்கள் இணையப் போக்குவரத்தே ஸ்தம்பித்துப் போய், வழக்கமான வரத்தில் 40% குறைவாகிப் போனது.
  • கூகுள் நிறுவனம் விளம்பரங்களிலிருந்து மட்டும் 20 பில்லியன் டாலர் வரை சம்பாதிக்கிறது.

 

திரைக்குப் பின்னால்

ஒரு தேடலுக்குப் பின்னால் என்ன நடக்கிறது? எப்படி மின்னல் வேகத்தில் முடிவுகள் நமக்குக் கிடைக்கின்றன? கூகுள் தேடல் தொழில்நுட்பத்தின் முதுகெலும்பு பேஜ்ரேங்க் வழிமுறை. இணையத்தில் சிதறிக் கிடக்கும் பக்கங்களில் உள்ள இணைப்புகளை வைத்து சிலந்திகளால் ஒரு வலையைப் பின்னி, பக்கங்களுக்கான தர வரிசைப்படி அவற்றை ஒழுங்குபடுத்தி வைக்கிறது. தேடப்படும் வாக்கியத்தில் உள்ள வார்த்தைகள் இடம் பெற்றிருக்கும் பக்கங்களை எடுத்து, பக்கத் தர வரிசைப்படி பக்காவான முடிவுகளை நொடிக்குள் நம் கண் முன் காட்டுகின்றது. அதிலும் 2013-லிருந்து கூகுள் உபயோகப்படுத்தி வரும் ஹம்மிங்பேர்டு வழிமுறையானது தேடப்படும் வார்த்தைகளை வைத்து என்ன தேட விழைகிறார்கள் என்பதைப் புரிந்து கொண்டு அதற்கேற்றாற் போல பொருள் சார்ந்த முடிவுகளைப் பட்டியலிடுகிறது.

வெறும் தேடுபொறியாக ஆரம்பித்த கூகுள், பல விதமான சேவைகளை வழங்கி காட்டுத் தீயாய் பரவிக் கொண்டிருக்கின்றது. என்ன தான் வாரி வாரிக் கொடுத்தாலும், கூகுள் நம்மை நிழலாய் பின்தொடர்கிறது. நமது தேடல் விவரங்கள் எல்லாம் அதற்கு மனப்பாடம்; அதனடிப்படையில் தான் நமக்கு விளம்பரங்களையேக் காட்டுகின்றது. எனவே உங்கள் தனிப்பட்ட தேடல் விவரங்கள் எல்லாம் கசியாமல், தவிர்க்க விரும்பினால் DuckDuckGo போன்ற தேடுபொறியை பயன்படுத்தவும்.

– தொடரும்