இன்று வாங்கிய புத்தகங்கள்

எங்கு நோக்கினும் அமேசான் மாபெரும் இந்தியத் திருவிழா தள்ளுபடி விளம்பரங்கள். தள்ளி நின்று வேடிக்கை தான் பார்த்துக் கொண்டிருந்தேன் என்றாலும், சில கிண்டில் மின்னூல்களுக்கு 75% தள்ளுபடி என்பதைப் பார்த்து விட்டு வாங்காமல் இருக்க முடியவில்லை. இன்று வாங்கிய புத்தகங்கள்:-

  1. ஒரு புளியமரத்தின் கதை – சுந்தர ராமசாமி
  2. அம்மா வந்தாள் – தி.ஜானகிராமன்
  3. மாதொருபாகன் – பெருமாள் முருகன்
  4. மொஸாட் – என்.சொக்கன்
  5. நல்ல தமிழில் எழுதுவோம் – என்.சொக்கன்

என்ன இருந்தாலும், மதுரைப் புத்தக கண்காட்சியை இந்த வருடம் தவற விட்டதில் சற்று மன வருத்தமே 😦

Advertisements

டன்கிர்க்

கிறிஸ்டோபர் நோலனின் ‘டன்கிர்க்’ திரைப்படத்தை இன்று பார்த்தேன். இரண்டாம் உலகப்போரின் போது ஜெர்மானியப் படை, நேசப்படைகளை பிரான்ஸில் உள்ள டன்கிர்க் துறைமுகத்தில் சுற்றி வளைத்தன. அங்கிருந்து இங்கிலாந்து வீரர்கள் தப்பி பிழைத்து தாய்நாடு திரும்பினர். வெற்றி தோல்வியின்றி திரும்பும் இந்த நிகழ்வை மையமாக வைத்து எழுதப்பட்டதே ‘டன்கிர்க்’ திரைப்படம். இத்திரைப்படத்தை ஏனைய இரண்டாம் உலகப்போர் சம்பந்தப்பட்ட படங்களிலிருந்து வித்தியாசப்படுத்தியிருப்பது, இது வெற்றியை பறைசாற்றவோ, இனப்படுகொலைகளை எடுத்துக்காட்டவோ இல்லை என்பது தான். dunkirk-poster நேசப்படைகள் சுற்றி வளைக்கப்படுவதில் ஆரம்பிக்கும் திரைப்படம், கப்பல்களில் வீரர்கள் திரும்புவது, ஜெர்மானிய படைகளின் வான்வழித் தாக்குதலை சமாளிப்பது, மக்கள் கப்பல்களில் வந்து வீரர்களைக் கூட்டிச் செல்வது என பயணித்து வாகை சூடாமல் தப்பி பிழைத்துத் தாய்நாடு திரும்பும் நாம் மக்கள் முகத்தில் எப்படி விழிப்பது என கவலையுடன் நாடு திரும்பும் வீரர்களுக்கு மக்கள் தரும் உற்சாக வரவேற்புடன் நிறைவடைகிறது. நீர், நிலம், வானம் என மூன்று இடங்களில் ஆரம்பித்து அவற்றை ஒரு புள்ளியில் இணையுமாறு திரைக்கதை அமைத்து தொடுவானத்தைத் தொட்டுக் காட்டியிருக்கிறார். ஐமாக்ஸில் படத்தைப் பார்க்கும் போது, குண்டுகள் திரையரங்குக்கு உள்ளேயே வெடித்தது போலிருந்தது; மணல் முகத்தில் தெறித்து விழாதது தான் குறை. ‘டன்கிர்க்’ – வரலாறு மிகவும் முக்கியம்; நன்று.

சவன்துர்கா

சவன்துர்கா என்று முடிவு செய்வதற்கே சனிக்கிழமை சாயங்காலம் ஆகிவிட்டது. ஞாயிற்றுக்கிழமை காலை ஏழு மணிக்கு எட்டு பேர் பெங்களூரிலிருந்து கிளம்பினோம். வழியில் காலை உணவை சாப்பிட்டு விட்டு சவன்துர்கா போய் சேர ஒன்பதரை ஆகிவிட்டது. வழக்கமான வழியல்லாது, வேறு ஒரு வழியில் கொஞ்ச தூரம் ஏறினோம்; பின்னர் அது சரிப்பட்டு வராது என்று மேலேறிச் செல்பவர்களைத் தொடர ஆரம்பித்தோம். ஞாயிற்றுக்கிழமையாதலால் வழியில் ஏகப்பட்ட பேர் ஏறிக் கொண்டும், இறங்கிக் கொண்டும் இருப்பதைக் காண முடிந்தது; பாதையைக் கண்டுபிடிப்பதற்குத் தோதாக வழியில் பாறைகளில் அம்புக்குறிகளும் போடப்பட்டிருந்தால் வழி தவறிச் செல்வதற்கு வாய்ப்புகள் குறைவு. சில சாகசப் பிரியர்கள் வழக்கமான வழியில் செல்லாமல் செங்குத்தான, வழுக்கலான பகுதிகளில் ஏறவும், இறங்கவும் செய்கிறார்கள், அதற்கு அனுமதி இல்லாவிட்டாலும் கூட. ஆங்காங்கே புகைப்படங்களையும் எடுத்துக் கொண்டே உச்சியை அடைய மதியம் பன்னிரெண்டரை ஆகிவிட்டது. உச்சியில் அடிக்கிற காற்றில் ஆளே பறந்து விடுவோம் போல. அர்க்காவதி ஆறும், ஊரும் மேலிருந்து பார்ப்பதற்கு அருமையாக உள்ளன. அங்கிருந்த நந்திக்கு வணக்கம் வைத்து விட்டு, கொண்டு சென்ற நொறுக்குத் தீனிகளை காலி செய்து விட்டு, சிறிது நேர ஓய்வுக்குப் பின் இறங்க ஆரம்பித்தோம். ஒரு மணி நேரத்தில் சரசரவென இறங்கி விட்டு பெங்களூருக்குக் கிளம்பினோம். மிதமான தட்ப வெப்பநிலை, அவ்வப்போது லேசான மழைத் தூறல் என இதமான வானிலை.  ஒரு தடவை மலையில் ஏறி இறங்கினால் ~8 கி.மீ தூரம் இருக்கும். வரும் வழியில் மஞ்சின்பேலே அணையைப் பார்க்கலாம் என்றால் பொதுமக்களுக்கு அனுமதியை தடை செய்து நான்கு வருடங்கள் ஆகிறதாம்; பக்கத்தில் எங்கு நின்று பார்க்கலாம் என்றும் சொல்லி அனுப்புகிறார்கள். சவன்துர்கா – ஒருநாள் பயணத்திற்கும், மலையேற்றத்திற்கும் நீங்கள் தயாரென்றால் போய் வரலாம்.

Savandurga

Savandurga

Mission Peak

சனிக்கிழமை இரவு தான் அடுத்த நாள் காலை மிஷன் மலை உச்சிக்குப் போவது முடிவு செய்யப்பட்டது. ஞாயிறு காலை 8 மணி வாக்கில் நானும், பிரவீனும் ஓஹ்ளோன் கல்லூரியில் இருந்து நடையைக் கட்ட ஆரம்பித்தோம். மலையின் தோற்றமும், உச்சியைத் தொடவிருந்த தூரமும் முதல் இரண்டு கிலோமீட்டரைக் கடக்கும் வரை மலைப்பை ஏற்படுத்தின. தட்பவெப்பத்துக்கு தக்கவாறு உடல் தயாரானதும், வேறு வழியில்லை என்று கால்கள் ஒத்துழைக்க ஆரம்பித்ததும் சிரமம் அவ்வளவாகத் தெரியவில்லை, அடுத்தடுத்த கிலோமீட்டர்களில். பச்சைப் பசேலெனப் படர்ந்திருந்த புல்வெளி வழியில் பல்லிளித்துக் கொண்டிருந்தது; ஆங்காங்கே மாடுகள் மேய்ந்து கொண்டிருந்தன; அலாரம் வைத்தெழுந்து ஸ்னூஸ் செய்து விட்டு படுப்பது போல், வழியில் சிறிது நேரம் எட்டிப்பார்த்த ஆதவன் பிறகு மறைந்து போனது. மக்கள் நடமாட்டம் தெரிய ஆரம்பித்தது; குச்சியை ஊன்றி சிலர் மலை ஏறிக் கொண்டிருந்தார்கள்; நாயுடன் வேட்டைக்கு செல்வது போல் சிலர்; விளம்பரங்களில் வருவது போல் மிதிவண்டியில் சிலர்… அப்படி, இப்படியென்று ஒண்ணே முக்கால் மணி நேரம் ஆயிற்று உச்சியை அடைய எங்களுக்கு; வெற்றி! உச்சியில் கடுங்குளிர் காற்று வீசியது. மேலிருந்து நோக்கும் போது, நகரம் கடுகளவாகி இருந்தது. ‘மிஷன் பீக்கர்’கம்பத்திற்கு அருகில் ஜம்முனு நின்று புகைப்படங்களை எடுத்து விட்டு, கீழிறங்கத் துவங்கினோம்.

1492380417436

Mission Peeker

மேலேறும் போது அடுத்தடுத்த அடிகள் எடுத்து வைப்பது சிரமமென்றால், இறங்கும் போது உருளும் கால்களை தடுத்து நிறுத்துவது சிரமம். என்றாலும் இறங்குவது எளிது; எடுத்துக் கொண்ட நேரமும் குறைவு. கடைசி இறக்கத்தில், இறங்கும் போது லேசான தூறல் இருந்தது. எரித்த கலோரிகளுக்கு இணையாக உணவை உட்கொள்ள வேண்டி, வண்டி தோசா ஹட் நோக்கி பயணித்தது.

புத்தகங்கள்

இந்த வருடத்தைய எனது வாசிப்பனுபவத்தைப் பற்றியும், வாசித்தப் புத்தகங்களைப் பற்றியும் குட்டி குட்டிக் குறிப்புகளாக இந்த பதிவிலிடுகிறேன்.

  • வெகுநாட்களாக எனது விருப்பப் பட்டியலில் இருந்த புத்தகங்களை வாசிக்க முடிந்தது. [தண்ணீர், பின்தொடரும் நிழலின் குரல், Metamorphosis, Animal Farm]
  • இரண்டு வருடங்களாக கிடப்பில் போடப்பட்டிருந்த கிண்டில் தூசு தட்டப்பட்டது.  பயணங்களின் போது பைக்குள் திணித்து வைப்பதற்கு தோதாக இருந்ததும், அமேசானின் இந்திய மொழிகளில் மின்புத்தகங்கள் அறிவிப்பும் கிண்டில் பக்கம் என் கவனத்தைத் திருப்புவதற்கு போதுமானதாக இருந்தன.
  • தொடர் பயணங்களில் புத்தகங்கள் வழித்துணையாக வந்தன. இவ்வருடத்தில் எனது வாசிப்பில் ஏற்பட்டுள்ள ஏற்றத்திற்கு இது ஒரு முக்கிய காரணம்.
  • பின்தொடரும் நிழலின் குரலுக்குப் பின் சென்று கொண்டிருந்த போது, அலுவலகப் பணி நிமித்தமாக அயல்நாடு பயணம் செய்ய நேரிட்டது. சில மாதங்களுக்குப் பின், அதைத் தொடரலாம் என்ற போது மீண்டும் முதலிலிருந்தே வாசிக்க நேரிட்டது. மீள்வாசிப்பில் குரல் முன்பை விடத் தெளிவாகவே கேட்டது. இவ்வருடம் நான் வாசித்ததில் மனதைக் கவர்ந்த புத்தகம்.
  • குட்ரீட்ஸ் புத்தகங்கள் வாசிப்பவர்களுக்கான சமூக வலைத்தளம். இதில் கணக்கு துவங்கி வருடங்களானாலும், பயன்படுத்த ஆரம்பித்தது என்னவோ இவ்வருடம் ஜீன் மாதத்திலிருந்து தான். அதில் 2016 வாசிக்கும் சவாலில் ’10 புத்தங்கள் வாசிக்க வேண்டும்’ என்று நானும் இணைந்தேன். ஒரு வழியாக நேற்று தான் பத்தாவது புத்தகத்தை வாசித்து முடித்து, அந்த சவாலை நிறைவு செய்தேன். மகிழ்ச்சி!
  • வாசித்த புத்தகங்களின் எண்ணிக்கை சென்ற ஆண்டை விட அதிகம். வரும் ஆண்டில் இவ்வருடத்தை விட அதிகமாக வாசிக்க வேண்டும் ;-).

screen-shot-2016-12-25-at-7-44-33-am

திரைப்படங்கள்

இந்த வருடம் நான் வெள்ளித்திரையில் கண்டுகளித்த திரைப்படங்கள் வெறும் 5 :-); வீட்டுத்திரையையும் சேர்த்து 30-40 தேறும்.  ஏன் வெறும் 5 என்று சொல்கிறேனென்றால், நாங்கலாம் வாரவாரம் ஒரு திரைப்படத்தை வெள்ளித்திரையில் காண்பவர்கள்; வீட்டில் ஒரே நாளில் 5 படங்களெல்லாம் பார்த்திருக்கிறேன். திரைப்படங்கள் பார்ப்பதைக் குறைத்துக் கொள்ள வேண்டுமென்பது எனது புத்தாண்டு உறுதிமொழிகளில் வழக்கமான ஒன்றாகும். எந்தவொரு உறுதியும் இந்த ஆண்டு எடுக்காமலே இதெப்படி சாத்தியமானது; தொடர் பயணங்களும், வாசிப்பும், வேலைப்பளுவும் காரணமாக இருக்கலாம். பார்த்தவற்றிலும் எதுவும் ஈர்க்கவில்லை. அக்டோபர் மாதம் முதல் திரைப்படங்களுக்காகவே பிரத்யேகமான சமூக வலைதளமான Letterboxd -ஐ பயன்படுத்தி வருகிறேன். அதிலுள்ள டைரிக் குறிப்புகளின் படி, கடந்த மூன்று மாதங்களில் (இன்று வரை) 6 படங்கள் பார்த்திருக்கின்றேன் :-).2016_watched_movies