போக்கிமான் கொல்! [குறுங்கதை]

pokemon_kill இந்த விளையாட்டை விளையாட ஆரம்பித்ததிலிருந்தே, அவனுக்கு பரபரப்பும் படபடப்பும் ஒரு சேர ஒட்டிக் கொண்டு விட்டன. சென்ற வாரம், முதல் போக்கிமானைப் பிடிக்கச் சென்ற இடத்தில் ஒருவர் கொடூரமான முறையில் கொல்லப்பட்டிருந்தார்; சம்பவம் நடந்த இடத்தில் போலீஸார் தீவிர விசாரணையில் ஈடுபட்டிருந்தனர். அது தற்செயலான சம்பவமாக இருக்கும் என அதைக் கடந்து, விளையாட்டைத் தொடர்ந்தான். ஆனால் அவன் சென்ற ஒவ்வொரு இடத்திலும்,  அதே முறையில், தொடர்ந்து கொலைகள் நடந்து, இரத்தக் கறைகள் பரவியிருந்தன … நாளிதழ்கள், டிவி சேனல்கள், சமூக வலை தளங்களென தொடர் கொலை பற்றிய செய்திகள்/வதந்திகள் வைரலாகிக் கொண்டிருந்தன. கொல்லப்பட்டவர்களுக்கிடையே எந்த ஒரு சம்பந்தமும் இல்லாததாலும், குற்றம் நடந்த இடங்களிலும் எந்த துப்பும் கிடைக்காததாலும் முடிந்த வரை முக்கிய இடங்களில் பாதுகாப்பைப் பலப்படுத்தியிருந்தது காவல் துறை. விளையாட்டிற்கும், தொடர் கொலைகளுக்கும் ஏதோ தொடர்பிருக்கின்றது என்று உள்ளுணர்வு அடித்துக் கொண்டாலும், போலீஸூக்கு செல்லவோ, விளையாடுவதை நிறுத்தவோ அவனுக்கு மனமில்லை. ஆட்டத்தைத் தொடர்ந்தான்… ஒரு வழியாக அடுத்த போக்கிஸ்டாப்பைக் கண்டுபிடித்து விட்டான். இந்த இடத்தில்  கொலை எதுவும் நடந்திருக்கவில்லை… அங்கிருக்கும் ஒவ்வொரு நிமிடமும் அவனது இதயத் துடிப்பு வெடித்து சிதறுமளவுக்கு எகிறிக் கொண்டிருந்தது. ஊரடங்கு உத்தரவு போடப்பட்டிருந்தது போல் வெறிச்சோடிக் கிடந்த அவ்விடத்தில், போக்கிமானையும் வேட்டையாடி விட்டு  கிளம்ப எத்தனித்த போது சற்று தொலைவில் யாரோ ஒரு முதியவர் யாருக்காவோ காத்திருப்பது போல தெரிந்தது. விரைவில் அவ்விடத்தை விட்டு நகரும் படி எச்சரித்து விட்டு செல்லலாம் என்று அவரை நெருங்கினான். சற்றும் எதிர்பாரா வண்ணம், அந்த முதியவர் பளபளக்கின்ற ஒரு கத்தியை எடுத்து சதக்கென்று இறக்கினார்… அவன் அனிச்சையாய் விலகியிருந்ததால், முதல் குத்து அவனுக்கு அதிக சேதத்தை விளைவித்திருக்கவில்லை. தொடர்ந்து தாக்குதலை எப்படி சமாளிக்கப் போகிறோம் என அவன் உறைந்து போயிருந்த நேரம், அடுத்தடுத்த எங்கிருந்தோ வந்த புல்லட்கள் அம்முதியவரை சாய்த்தன… மறைவிலிருந்த வெளிப்பட்ட காவல் துறை நண்பர் விளக்கினார், ‘இந்த சைக்கோ கொலைகாரனைப் புடிக்க எங்களுக்கு உருப்படியா ஒரு க்ளூவும் கிடைக்கல… கொல்லப்பட்டவங்க மொபைல்ல, அவங்க கடைசியா யூஸ் பண்ண ஆப்ஸ பார்த்தோம். அதில மேட்ச் ஆன ஆப்ஸ்ல ‘போக்கிமான் கோ’வும் ஒண்ணு. அதைத் தவிர இந்த கேஸ்ல வேறெந்த இம்ப்ரூவ்மெண்ட்ஸூம் இல்லாதப்ப தான், கொலை நடந்த இடங்களுக்கு அடுத்தடுத்த நீ வந்துட்ட போனத  நோட் பண்ணி, உன்ன ஷேடோயிங் பண்ணா ஏதாவது க்ளூ கிடைக்கும்னு நினைச்சோம். தட் வொர்க்டு. தாங்ஸ் ஃபார் யுவர்  ஹெல்ப்  டு ஃபண்ட் திஸ் சைக்கோ! பை த வே, க்ளூ தெரிஞ்சிருந்தும் எங்களுக்கு இன்பார்ம் பண்ணாம நீ விளையாடிட்டு இருந்தனால தான், அவன் உன்ன முதல் குத்து குத்துற வரைக்கும் வெயிட் பண்ணிட்டு, அவன சுட்டேன். இட்ஸ் நாட் எ கேம் …’

Advertisements

நீலத் திமிங்கலம்

சில நாட்களாகவே நீலத் திமிங்கலம் விளையாட்டைப் பற்றியே ஊரெங்கும் ஒரே பேச்சு. ஆனால் அவன் தற்போது நீலத் திமிங்கல விளையாட்டின் மேல் காட்டும் அதீத ஆர்வத்திற்கு காரணம், அவன் தங்கையின் முகநூல் பக்கத்தில் சில நாட்களுக்கு முன் அவள் வெளியிட்ட நிலைச்செய்தி ‘நான்_ஒரு_திமிங்கலம்‘. அவன் உள்ளுணர்வு ஏதோ சொல்லியது. சில நாட்களாகவே அவளது நடவடிக்கையில் தென்பட்ட மாற்றங்கள் சந்தேகத்தைக் கிளப்பியது; அத்தற்கொலை விளையாட்டைப் பற்றிய செய்திகள்/கட்டுரைகள் சந்தேகத்தை உறுதிப்படுத்தியது. தாமதியாமல் அவளை அழைத்துப் பேசினான்; முதலில் மறுத்த அவள், பின்னர் ஒத்துக் கொண்டாள். வீட்டின் உச்சியில் செல்ஃபி, முகநூலில் நிலைச் செய்திகள், பிளேடால் கையில் திமிங்கலம் வரைந்தது என அவள் அதுவரை செய்திருந்த பணிகளையும், விளையாட்டிலிருந்து மீள முடியாமல் மூழ்கிக் கொண்டிருப்பதாக அவள் கூறியதையும் கேட்டு உறைந்து போய் நின்றான். விரைந்து செயலாற்றி, அவளது இணையக் கணக்குகளை நீக்கினான்; கைபேசியிலுள்ள அனைத்து தரவுகளையும் அழித்தான்; அவளை ஆசுவாசப்படுத்தினான் … சில நாட்களுக்கு பின்னர், அவளது கையில் பிளேடால் வரைந்திருந்த திமிங்கலம் ஆறிப் போயிருந்தது; அவளது வாழ்க்கை மாறிப் போயிருந்தது.

வாழ்க்கை வாழ்வதற்கே! நீலத் திமிங்கலம் தவிர்.

ஈர்ப்பும் வடையும்

ஓர் ஊரில் பாட்டி ஒருவர் விற்பதற்காக வடை சுட்டுக் கொண்டிருந்தார். அவர் அசந்த நேரத்தில் அவ்வழி சென்ற காக்கா ஒன்று, ஒரு வடையை அவரிடமிருந்து சுட்டுக் கொண்டு பறந்து போய் மரக்கிளை ஒன்றில் உட்கார்ந்து, அவ்வடையை ருசிக்கத் தயாரானது. அம்மரத்தின் கீழே பசியுடன் அமர்ந்திருந்த நியூட்டனுக்கு காக்காவிடமிருந்த வடையைக் கண்டு உமிழ்நீர் சுரந்தது. உடனே நியூட்டன் காக்காவைப் பார்த்து, ‘அறிவில் சிறந்த காகமே, உனக்கு ஈர்ப்பு விசை என்றால் என்னவென்று தெரியுமா?’ என்று வினவினார். காக்கா ‘தெரியாது!!!’ என்று சொல்லி முடிப்பதற்குள், காக்காவின் வாயிலிருந்த வடை கீழே விழுந்து, நியூட்டனின் கைகளுக்குள் தஞ்சம் புகுந்தது. ‘ஈர்ப்பு விசையால் தான் இவ்வடை நேராக என் கையில் வந்து விழுந்தது.’ என்று காக்காவுக்கு விடையை விளக்கி விட்டு, வடையை சுவைக்க ஆரம்பித்தார் நியூட்டன்.

கர்ஜனை

காட்டில் உள்ள விலங்குகள், பறவைகளென அனைத்து உயிரிகளும், கர்ஜிப்பதைத் தவிர வேறெந்த குரலோ/ஒலியோ எழுப்பலாகாது என சிங்க ராஜா அதிரடியாக அவசர அரசாணை ஒன்றை பிறப்பித்தது. ‘என்னடா இது வம்பா போச்சு! நமக்கு எப்படி கர்ஜிக்க வரும்?’ என மைண்ட் வாய்ஸ் எழுந்தாலே, அவர்கள் வனத்துரோகிகள் என குற்றஞ்சாட்டப்பட்டு காடு கடத்தப்பட்டார்கள். இந்த சூழ்நிலையில் ஆணையை மறுத்தவர்களும், எதிர்த்தவர்களும் ஏதாவதொரு ஊன் உண்ணிக்கு விருந்தாகியிருப்பார்கள் என்பதை தனியாக விளக்கத் தேவையில்லை. எஞ்சியிருந்தவர்கள் ஒன்றும் பேச முடியாமல் மௌனத்தைக் கடைபிடித்தார்கள். நாட்கள் ஓடின… காடு இயல்பு நிலைக்கு திரும்பிய பின், தன் வேட்டையை முடித்துக் கொண்டு காடு திரும்பிய சிங்க ராஜாவுக்கு காட்டின் அமைதி கண்டு மட்டற்ற மகிழ்ச்சி. மாதங்கள் ஓடின… அடுத்ததாக ஒரு நன்னாளில் அனைவரின் ஏகோபித்த ஆதரவுடன் கர்ஜனை காட்டின் குரலாக அறிவிக்கப்பட்டு, அதைக் கொண்டாடும் வகையில் ஒரு வாழ்த்து வடையும் சுட்டு அனுப்பப்பட்டது, ஊமையாகிப் போய் தமக்கு நாக்கு எதற்கு என மறந்து போன வன உயிரிகளுக்கு. ஓங்கி ஒலிக்கட்டும், கர்ஜனை!

கற்றல்

அவன் குடிலை அடைந்த போது மதியமாகிவிட்டிருந்தது. குடிலின் வெளியே மரத்தடியில் தியானத்திலமர்ந்திருந்த குருஜியிடம், ‘குட் ஆஃப்டர் நூன் குருஜி! நான் தங்களது குருகுலத்தில் சேர விரும்புகிறேன். இங்கு நான் என்ன கற்றுக் கொள்வேன்?’ என்று அட்மிஷன் ஓகேயாகும் முன்னரே, ப்ரீபேர்டு செய்து வைத்திருந்த, ப்ரீபெய்டு கேள்வியைக் கேட்டான் அந்த  ஸ்மார்ட் சிறுவன். மதிய உணவுக்குப் பின் பதிலளிப்பதாகக் கூறி விட்டு, அவனையும் உணவு உண்ண அழைத்தார் குருஜி. நெடிய பயணத்தால் களைத்துப் போயிருந்தவனுக்கு அது சரி எனப்பட்டது. குடிலுக்குள் நுழைந்தவனுக்கு ஆச்சர்யம்!!! அனைத்து வகையான உணவு வகைகளும் பரப்பி வைக்கப்பட்டிருந்தன. பிடித்தவற்றையெல்லாம் தட்டில் எடுத்து வைத்து ஒரு பிடி பிடித்தான். மதிய உணவுக்குப் பின் அவனை சந்தித்த குருஜி  ‘எல்லா வகையான உணவுகளும் இருந்தாலும், உனக்குப் விருப்பமானவற்றையே எடுத்து உண்டு உன் பசியைப் போக்கினாய். அதே போல, எத்துணை விஷயங்களை இங்கு போதித்தாலும், உனக்கு எதில் நாட்டமுள்ளதோ, அதுவே உன்னை வந்தடையும். அதையே நீ கற்பாய்!‘ என்று பதிலுரைத்தார்.  இப்போது அந்த சிறுவன், ஸ்மார்ட் சீடனாகியிருந்தான்.

#டிரெண்ட்ஸ்

ஏகப்பட்ட மிஸ்டு கால்கள் மற்றும் வாட்ஸ் ஆப் செய்திகளில் விழிக்க வேண்டியிருந்தது; நாளிதழ்களின் ட்வீட் கார்னர்களில், எனது ட்விட்டர் கணக்கில் நேற்று சக நடிக, நடிகையரைப் பற்றி வெளியிடப்பட்டிருந்த ட்வீட்டுகள் உட்கார்ந்திருந்தன; தொலைக்காட்சியை ஆன் செய்தால் அதே ட்வீட்டுகள் பிரேக்கிங் நியூஸில் வலமிருந்து இடம் ஓடிக் கொண்டிருக்கின்றன;ட்விட்டரில் #நான்_லீக்ஸ் டிரெண்டிங். ட்வீட்டுகள் ஒவ்வொன்றும் அன்லிமிட்டெட் சுவீட்ஸை ஊடகங்களுக்கு ஆன்லைன் டெலிவரி செய்தது போலிருந்தன. அவனுக்கு தலை சுற்றியது … நேற்று இரவு பார்ட்டியில் கலந்து கொண்டது நினைவிலிருக்கிறது; இடையே சக நடிக, நடிகையருடன் வாக்குவாதம் முற்றியது அரை குறையாய் நினைவில் பதிந்தும், அழிந்துமிருக்கிறது; அவ்வளவு தான்; அதற்கு பின் என்ன நடந்தது என்று சுத்தமாக நினைவில் இல்லை. சில நிமிடங்கள் யோசனைக்குப் பின், அவனது ட்விட்டர் கணக்கில் நுழைந்து, நேற்று பதிவேற்றப்பட்ட ட்வீட்டுகளை நீக்கி விட்டு, ‘நேற்று எனது ட்விட்டர் அக்கவுண்ட் ஹேக் செய்யப்பட்டு விட்டது‘ என்று ஒரு ட்வீட்டை தட்டிவிட்டு விட்டு வெளியேறினான், அந்த நடிகன்.

பி.கு: இக்கதையில் வரும் சம்பவங்கள் கற்பனையே. யாரையும் குறிப்பிடுவன அல்ல.

தூங்காவரம்

அடர்காட்டின் நடுவே இளஞ்சிங்கம் ஒன்று கானகத் தெய்வத்தை மனதில் நிறுத்தி தவம் புரிந்து வந்தது. அதன் தவத்தை மெச்சிய கானகத் தெய்வம் ‘எதற்காக இந்த தவம்?’ என வினவியது. பகல் இரவு பாராமல் தொடர்ந்து வேட்டையில் திளைக்க, தூங்காவரம் தரவேண்டும் என்று பதிலுரைத்தது; கேட்ட வரத்தைக் கொடுத்து விட்டு கானகத் தெய்வம் மறைந்தது. நாட்கள் மெதுவாக நகர்ந்தன… வேட்டையில் பெரிதாக ஏற்றமோ, மாற்றமோ, தாக்கமோ ஏற்படவில்லை; தூங்காவரத்தால் சிங்கத்துக்கு  தூக்கம் போனது தான் மிச்சம்.